ELOBELI TITRE YA EZIPELI | BATATOLI YA YEHOVA BAZALI BANANI?
Biso Batatoli ya Yehova tozali bato ya ndenge nini?
Tozali ebongiseli ya mokili mobimba oyo esanganaka na mangomba mosusu te. Atako Biro monene na biso ezalaka na États-Unis, ebele ya Batatoli ya Yehova bafandaka na mikili mosusu. Kutu, tozali bato milio soki mwambe mpe toteyaka bato Biblia na mikili koleka 230. Tosalaka bongo mpo na kotosa maloba oyo ya Yesu: “Nsango malamu oyo ya bokonzi ekosakolama na mabele mobimba esika bato bafandi mpo ezala litatoli na bikólo nyonso; bongo nsuka ekoya.”—Matai 24:14.
Ezala tofandi esika nini, totosaka mpenza mibeko. Kasi tosalaka nyonso tókɔta te na makambo ya politiki. Ezali mpo totosaka maloba oyo Yesu alobaki na bakristo ete “bazali bato ya mokili te.” Yango wana tokɔtaka te na makambo ya politiki to kopesa mabɔkɔ na bitumba. (Yoane 15:19; 17:16) Kutu, na boumeli ya Etumba ya Mibale ya mokili mobimba, bakɔtisaki Batatoli ya Yehova na bolɔkɔ, babɛtaki bango mabe mpo baboyaki kokɔta na makambo ya politiki. Episkɔpɔ moko ya kala ya Allemagne, akomaki boye: “Bato yango bakoki mpenza koloba ete kaka bango nde baboyaki kopesa Hitler mabɔkɔ mpo na kotosa lisosoli na bango.”
“Ndenge oyo [Batatoli ya Yehova] bakangamaka na bizaleli malamu ekamwisaka mpenza. Tokoki kopesa bato yango oyo bazalaka na ezaleli ya moimi te bibonga minene na politiki, kasi bakondima yango ata moke te. . . . Batosaka bakonzi ya Leta, kasi bandimaka ete kaka Bokonzi ya Nzambe nde ekosilisa bampasi nyonso ya bato.”—Zulunalo moko (Nová Svoboda), République tchèque.
Ata bongo, tofandaka esika moko na bato nyonso. Yesu abondelaki Nzambe boye mpo na bayekoli na ye: “Nazali kosɛnga yo, olongola bango na mokili te.” (Yoane 17:15) Yango wana okoki komona biso na mosala, na bamagazini mpe na bakelasi na bisika oyo tofandaka.