Lobelá makambo oyo ezali kobima na mokili mpo na kobenda likebi ya moto

¹ Olingi kozala ntango nyonso na makanisi ya sika mpe ya malamu oyo ekosalisa yo na mosala ya kosakola mpe ekobenda likebi ya bato ete básepela na nsango ya Biblia? Na yango salelá makambo oyo ezali kobima na mokili mpe oyo ezali kobima na mboka na bino mpo na kobanda lisolo na bato. Okoki kolobela makambo oyo ezali koleka na esika oyo ofandaka to na ekólo na bino to bansango oyo ezali kouta na mikili mosusu. Makambo yango ezalaka ntango nyonso ndenge moko te. (1 Kol. 7:31) Talá bandakisa oyo elandi.

² Mikakatano ya nkita mpe komata ya ntalo ya biloko ezali mpenza kotungisa bato. Na yango, okoki koloba boye:

◼ “Oyokaki nsango ete ntalo ya [lobelá eloko yango] emati lisusu?” To okoki kolobela likambo ya kozanga mosala soki kompanyi moko ya monene euti kolongola basali mingi na mosala. Na kotalela ndenge olingi kokoba lisolo yango, okoki kotuna motuna moko kati na mituna oyo: “Osi omituna mpo na nini bomoi ezali mpasi boye?” to “Okanisi ete ekozala ntango nyonso mpasi mpo na kozwa biloko ya kobikela?”

³ Bansango ya mobulu, lokola makambo ya nsɔmɔ oyo ezali kosalema na kati ya mabota to epai ya bana-kelasi, ekoki mpe kopesa libaku mpo na kobanda lisolo. Okoki kotuna boye:

◼ “Otangaki nsango ya [lobelá likambo yango oyo esalemaki na esika oyo bofandi] oyo balobelaki na zulunalo?” Na nsima, tuná motuna moko kati na mituna oyo mibale: “Okanisi ete mobulu oyo ezali na mokili eutaka wapi?” to “Okanisi ete mokolo mosusu tokozala mpenza na kimya?”

⁴ Bansango ya mpela oyo ezali kobebisa biloko ya bato, koningana ya mabele, to mobulu ya bana-mboka na bisika ndenge na ndenge na mokili ezali mpe kopesa nzela mpo na kobenda likebi ya bato. Na ndakisa, okoki kotuna boye:

◼ “Nzambe nde azali kosala makambo lokola [lobelá likama moko oyo euti kosalema mpo na biloko bizalisami]?” To okoki kolobela mobulu ya bana-mboka oyo euti kosalema mikolo oyo mpe kotuna motuna oyo: “Soki mpenza bato nyonso balingaka kimya, mpo na nini ezali mpasi mpo na kotya yango?”

⁵ Osengeli ntango nyonso koyeba makambo oyo ezali kobima, makambo oyo okoki kosalela mpo na kobanda lisolo na moto. Okoki kokuta makanisi mosusu oyo ekoki kosalisa yo na buku Comment raisonner na lokasa 9 mpe 10, na motó ya likambo “Actualité.” Kasi, osengeli kokeba ete okɔta te na makambo ya politiki to opesa makanisi te mpo na ndenge ya kosilisa mikakatano oyo ezali na mboka. Osengeli nde kobenda likebi ya bato na Makomami mpe komonisa bango ete bobele Bokonzi ya Nzambe nde ekosilisa mikakatano ya bato.