Salisá bato mosusu báyangana na makita
1 “Tozali na esengo ya kobenga moto nyonso oyo azali zingazinga . . . oyo alingi koyangana na makita ete aya.” Banda liyebisi oyo ebimaki na Linɔ́ngi ya Mosɛnzɛli ya Siona ya Novɛmbɛ 1880 (na Lingelesi), Batatoli ya Yehova babengaka bato báya ntango nyonso kosangana na bango mpo na koyekola Biblia. (Emon. 22:17) Yango ezali eteni ya ntina mingi na losambo ya solo.
2 Koyangana ezali na ntina: Koyangana na makita ya lisangá epesaka biso mapamboli. Yango esalaka ete tóyeba Yehova, Nzambe na biso ya kokamwa, malamumalamu. Na kati ya lisangá, tokutanaka elongo mpo na ‘kolakisama na Yehova.’ (Yis. 54:13) Ebongiseli na ye epesaka programe ya mateya ya Biblia oyo esalaka ete tózala na boyokani malamu elongo na ye mpe esalisaka biso tótosa “toli ya Nzambe nyonso.” (Mis. 20:27, NW; Luka 12:42) Makita ebongisaka biso mpo tóyeba koteya Liloba ya Nzambe. Makundoli oyo ezali na Makomami esalisaka biso tózala na boyokani malamu na bato mosusu mpe na Yehova. Kosangana elongo na bato oyo balingi Nzambe elendisaka kondima na biso.—Lom. 1:11, 12.
3 Bengá moto nokinoki: Banda na boyekoli ya liboso, bengá moyekoli nyonso ya Biblia ayangana na makita. Pesá ye lokasa ya libyangi. Mpo na kobenda likebi na ye, okoki kosalela ata likambo moko oyo elendisaki yo na likita oyo euti kosalema mpe okoki kotalela elongo na ye likambo moko oyo ekolobelama na likita ya pɔsɔ ya nsima. Limbolelá ye ndenge Ndako ya Bokonzi ezali, mpe omindimisa ete akomona yango.
4 Soki moyekoli abandi koyangana mbala moko te ntango obengi ye, kotika te kobenga ye. Zwá mwa miniti pɔsɔ na pɔsɔ mpo na komonisa ye ndenge oyo ebongiseli na biso etambwisamaka. Salelá mwa buku Mokano ya Nzambe mpe kasɛti video Les Témoins de Jéhovah: un nom, une organisation mpo na kosalisa ye ayeba biso mpe makita na biso malamu. Ntango ozali kokende kotala ye kendáká mpe na basakoli mosusu mpo amesana na bango. Na kati ya libondeli, pesá Yehova matɔndi mpo na ebongiseli na ye mpe lobelá ntina oyo moyekoli asengeli kokɔta na ebongiseli yango.
5 Kokakatana te mpo na kosalisa bato ya sika ete básangana na biso elongo. Soki botɔndi na bango mpo na Yehova ezali kokola, yango ekotinda bango básalela makambo oyo bazali koyekola mpe bákɔta na ebongiseli ya Nzambe oyo ezali na bomoko.—1 Kol. 14:25.