Tómema bayekoli na lisangá ya Yehova
1 “Ezali nsango oyo esakolami na nkóta koleka 200. Ezali nsango oyo eyokami na mikili koleka 210. Ezali nsango oyo epesami na bato nyonso, ezala bisika nini bafandi. Yango ezali mosala ya kosakola oyo esalama naino na lolenge oyo na mokili te, nsango oyo ezali kosangisa bamilió ya bato. Batatoli ya Yehova bazali kokokisa mosala yango uta koleka ekeke moko!”
2 Lisoló oyo ezali kati na kasɛti vidéo Les Témoins de Jéhovah — Un nom, une organisation ebandi na maloba wana. Ezali kopesa biyano na mituna oyo milandi: Batatoli ya Yehova bazali mpenza banani? Ndenge nini mosala na bango ebongisami? Ndenge nini mosala ya kosakola etambwisami? Mosolo moutaka wapi? Ezali komonisa polele epai na baoyo bazali kotala yango ete “Batatoli ya Yehova ya mokili mobimba basangani mpe babongisami mpo na kosunga bazalani na bango ete bálendisa kondima na bango kati na Biblia” mpe bazali kolendisa bango ete bátya motema na lisangá ya Batatoli ya Yehova. Nsima ya kotala kasɛti yango moyekoli moko ya mwasi alelaki na esengo mpe na matɔ́ndi, mpe alobaki ete: “Ndenge nini ekoki kosalema ete okanga ntina te ete ezali lisangá ya Yehova Nzambe ya solo?”—Talá 1 Bakolinti 14:24, 25.
3 Mwasi mosusu, na boumeli ya ntango molai azalaki koyekola Biblia, atiki mpe azongeli mbala na mbala, kasi azalaki kondima te ete Bosato (Trinité) ezali liteya ya lokuta. Mpe balakisaki ye na mobali na ye kasɛti. Bakamwaki mingi na filime yango mpe batalaki yango mbala mibale bobele na mpokwa moko wana. Na boyekoli elandaki, mwasi yango amonisaki mposa na ye ya kokóma Motatoli. Alobaki ete, kino mokolo atalaki filime, makanisi na ye mazalaki likoló na kondima na ye na liteya ya Bosato mpe azalaki kobosana kotala lisangá na biso mpe baoyo bazali basangani na yango. Kasɛti yango epesaki ye nzela ya koyeba ete amoni lisangá ya solo. Alingaki kobanda kosakola ndako na ndako mbala moko. Balimbwelaki ye matambe asengeli kosala mpo na kokóma mosakoli oyo azwi naino batisimo te, nsima na yango alobaki ete: “Nakosala makasi.” Atikaki lingomba na ye, abandaki kosakola mpe akómaki na makoki mingi mpo na kokweisa liteya ya Bosato.
4 Eyebani malamu ete bayekoli ya Biblia basalaka bokoli mingi na elimo mpe bakolaka noki kino kotela ntango bandimi lisangá ya Yehova mpe bakoti kati na yango. Likambo oyo emonisi yango, nsima wana bayekoli 3 000 bazwaki batisimo na Pantekɔte, “baumelaki ntango nyonso na mateyo na bantoma, na lisangana.” (Mis. 2:42, NW, maloba na nsé ya lokasa) Ezali likambo ya ntina ete tósalisa bayekoli ete básala mpe lolenge moko lelo. Ndenge nini?
5 Tókokisa mokumba na biso: Baoyo nyonso bazali kozalisa bayekoli basengeli kokanga ntina ete bazali na mokumba ya komema bayekoli ya Biblia na lisangá ya Nzambe. (1 Tim. 4:16) Boyekoli mokomoko esengeli kozala litambe moko oyo esalemi mpo na kobelema na mokolo ya esengo oyo moyekoli akomonisa komipesa na ye epai na Yehova na nzela ya batisimo na mai. Moko ya mituna oyo bakotuna ye na ntango ya molulu ya batisimo ezali oyo ete: “Okangi ntina ete na komipesa mpe kozwa batisimo okómi moko ya Batatoli ya Yehova mpe okómi mosangani na lisangá ya Nzambe oyo etambwisami na elimo santu?” Ezali bongo likambo ya ntina, báyeba ete bakoki kosalela Nzambe te soki bakoti te na lisangá ya solo ya boklisto.—Mat. 24:45-47; Yoa. 6:68; 2 Kol. 5:20.
6 Tólanda kosolola na moyekoli likoló na lisangá na biso mpe lisangá ya Batatoli ya Yehova na mokili mobimba. Tósala yango pɔ́sɔ na pɔ́sɔ uta boyekoli ya liboso. Uta ebandeli, tóbenga moyekoli ete asangana na makita mpe tólanda kosala bongo.—Emon. 22:17.
7 Tósalela bisaleli oyo bipesameli biso: Bisaleli malamu oyo tozali na yango mpo na kotambwisa boyekoli na ndako ezali bongo mwa búku Nzambe azali kosɛnga nini epai na biso? mpe búku Boyebi oyo ezali komema na bomoi ya seko. Mikanda yango mibale mizali komonisa ntina ya kokota na lisangá. Tozali kotánga na nsuka ya liteya 5 kati na mwa búku Azali kosɛnga ete: “Osengeli kolanda koyekola makambo na ntina na Yehova mpe kotosa masɛngami na ye. Koyangana na makita na Ndako ya Bokonzi ya Batatoli ya Yehova, oyo ezwami na esika ofandi, ekosalisa yo na kosala bongo.” Búku Boyebi ezali kolendisa moyekoli mbala na mbala ete ayangana na makita. Na mokapo 5, paragrafe 22, epesi libyangi oyo ete: “Batatoli ya Yehova . . . bazali kolendisa yo ete osangana elongo na bango mpo na kosambela Nzambe ‘na elimo mpe na solo.’ (Yoa. 4:24)” Tozali kotánga na mokapo 12, paragrafe 16: “Soki okolanda koyekola mpe soki okokamata momeseno ya koyangana na makita ya Batatoli ya Yehova, kondima na yo ekokemba mingi koleka.” Mokapo 16, par. 20, elobi ete: “Salá ete koyangana na makita ya Batatoli ya Yehova ezala momeseno na yo.” Ebakisi ete: “Yango ekosalisa yo na kososola mpe na nsima kosalela boyebi ya Nzambe kati na bomoi na yo mpe ekopesa yo esengo. Kozala kati na libota ya boklisto oyo ezali na bondeko kati na mokili mobimba ekosalisa yo na kobɛlɛma epai na Yehova.” Mokapo 17 ezali kolimbola na mozindo ndenge nini tokoki kozwa libateli ya solo kati na libota ya Nzambe. Ntango tozali koyekola na bato, tozali na mokumba ya kobimisa polele makanisi ya biteni yango ya mokanda.
8 Mwa búku Ba Témoins de Jéhovah—Basangani mpo na kosala mokano ya Nzambe na mokili mobimba ezali esaleli moko malamu ebimisami mpo ete bato bámesana na lisangá bobele moko oyo ezali komonana mpe oyo Yehova azali kosalela na mikolo na biso mpo na kokokisa mokano na ye. Bandimbola ya mozindo oyo ezali kati na yango na ntina na mosala na biso, makita mpe lisangá ezali kolendisa motángi ete asangana na biso mpo na kosambela Nzambe. Bobele na ebandeli ya boyekoli, tolendisami ete tópesa na moyekoli ekzamplɛre moko ya mwa búku yango mpo ete akoka kotánga yango. Ezali na ntina te ete tóyekola yango elongo na ye ndenge tozalaki kosala yango liboso.
9 Bamoko ya bakasɛti vidéo oyo ebimisami na la Société ezali bisaleli bibongi mpenza mpo na komema bayekoli na lisangá ya Yehova. Ekozala malamu ete bátala bakasɛti vidéo oyo elandi: (1) La Société du monde nouveau en action ezongeli filime ya 1954 oyo ezali komonisa makanisi malamu, mpiko mpe bolingo oyo ezali na lisangá ya Yehova; (2) Unis grâce à l’enseignement divin ezali komonisa kimya mpe bomoko oyo emonanaki na mayangani ya mikili mingi na Mpótó ya Ɛ́sti, na Amerika ya Sudi, na Afrika mpe na Azia; (3) Jusqu’aux extrémités de la terre ezali komonisa mobu ya 50 ya Gileadi, Eteyelo ya Biblia ya la Société Watchtower, mpe ezali komonisa mosala oyo bamisionere bazali kokokisa kati na mosala ya kosakola na mokili mobimba; (4) La fermeté des Témoins de Jéhovah face à la persécution nazie ezali kolobela mpiko monene mpe bolongi ya batatoli liboso na minyoko makasi oyo ebimisamaki na Hitler; mpe lisusu (5) Les Témoins de Jéhovah — Un nom, une organisation.
10 Tótyela bango mikano ya kokokisa mokemoke mpo na makita: Esengeli na biso kolimbwela bayekoli ete tozali mpenza na mposa ya mateya oyo mapesami na nzela ya boyekoli ya Biblia na ndako mpe na oyo ya etuluku, na ntango ya makita ya lisangá. (Yoa. 6:45) Moto ya sika asengeli kokolisa boyebi na ye ya Makomami mpe ya lisangá. Lolenge bobele moko ya kokokisa yango ezali koyangana na makita. (Ebe. 10:23-25) Uta ebandeli, tóbenga moto yango ete ayangana na makita. Bato oyo basepeli na solo kala mingi te babandi koyangana na makita liboso ete bábanda boyekoli ya Biblia ya mbala na mbala. Ezali mpe na ntina ete biso moko tópesa ndakisa na kozaláká na makita ntango nyonso.—Luka 6:40; Filp. 3:17.
11 Tóyebisa makambo mingi mpenza na ntina na makita mpe lolenge yango esalamaka mpo ete moyekoli amiyoka malamu. Bato mosusu bamiyokaka malamu te ntango bakei mpo na mbala ya liboso na esika mosusu; ezali malamu kokende elongo na moyekoli na Ndako ya Bokonzi ntango ayei koyangana mpo na mbala ya liboso. Akomiyoka malumu mpenza soki tozali na ye elongo na ntango oyo azali kosolola na basangani mosusu ya lisangá. Na koleka mpenza, tózala bayambi malamu ya bapaya: mopaya na biso asengeli komiyoka ete ayambami malamu mpe azali komiyoka malamu.—Mat. 7:12; Filp. 2:1-4.
12 Tólendisa moyekoli ete ayangana na liyangani ya mokolo moko, na liyangani ya zongazonga to na liyangani ya etúká ntango moko na yango ekosalema. Ntango mosusu tokoki kokende na ye elongo.
13 Tómonisa botɔ́ndi: Tozali kotánga kati na búku Lisangá mpo na kokokisa mosala na Nzambe, lokasa 93: “Soki masoló na yo elongo na bato basepeli na solo mamonisi ete yo moko ozali kokumisa lisangá ya Yehova, ekozala mpe mpasi te na bato ya sika ete bákolisa ezaleli motindo moko wana, mpe yango ekosalisa bango ete bákola kati na boyebi ya Yehova.” Tókumisa ntango nyonso lisangá na biso, tólobela yango mabe soko moke te. (Nz. 84:10; 133:1, 3b) Kati na mabondeli oyo tozali kosala na ntango ya boyekoli, tólobela mpo na lisangá mpe ntina oyo moyekoli azali na yango ya kosangana ntango nyonso na lisangá.—Ef. 1:15-17.
14 Ntembe ezali soko moke te ete tolingi komona bato ya sika komonisa botɔ́ndi ya solo mpo na boninga malamu mpe libateli ya elimo oyo tozali na yango kati na libota ya Nzambe. (1 Tim. 3:15; 1 Pet. 2:17; 5:9) Tósala nyonso oyo ekoki na biso mpo na komema bayekoli ya Liloba ya Nzambe na lisangá ya Yehova.
[Likanisi ya paragrafe na lokasa 3]
Bayekoli bazali kokola noki na elimo ntango bazali koyeba malamu lisangá bango moko
[Likanisi ya paragrafe na lokasa 4]
Tózela te mpo na kobengisa bayekoli na makita