“Nzambe akoki kosala nyonso”
1 Mosala ya libosoliboso ya lisangá ya Boklisto ezali ya kosakola nsango ya Bokonzi na mokili mobimba. (Mat. 24:14) Yango ezali mpenza mosala monene. Bato mingi oyo bazali komona ndenge mosala yango ezali kosalema, bakanisaka ete ezali kosɛnga mbongo mingi koleka oyo tozali na yango. Bamosusu mpe bamonaka ete ezali mpasi mpo biso tókokisa mosala yango mpamba te bato mingi batyolaka biso, bazali kotɛmɛla biso, mpe bazali konyokola biso. (Mat. 24:9; 2 Tim. 3:12) Bato ya ntembe bazali kondima kutu te ete mosala yango ekoki kokokisama. Kasi, Yesu alobaki ete: “Nzambe akoki kosala nyonso.”—Mat. 19:26.
2 Bandakisa malamu oyo tosengeli kolanda: Ntango Yesu abandaki mosala na ye, azalaki lokola moto moko oyo mokili mobimba ezali kobundisa. Mpo na kotya ye nkaka alonga te na mosala yango, batɛmɛli basambwisaki ye na ndenge nyonso, mpe na nsima babomaki ye na liwa moko ya nsɔmɔ. Kasi, na nsuka, Yesu alobaki polelepolele ete: “Nasili kolonga mokili.” (Yoa. 16:33) Talá likambo ya kokamwa!
3 Bayekoli ya Yesu bamonisaki mpiko mpe molende motindo moko na mosala ya Boklisto. Babɛtaki mingi kati na bango fimbo, makofi, batyaki bango na boloko, mpe bamosusu kutu babomamaki. Atako bongo, bazalaki “kosepela mpamba te batángamaki ete bábongi na kozwa nsɔni mpo na nkombo na ye.” (Mis. 5:41) Mikakatano ezalaki mingi, kasi atako bongo bakokisaki mosala oyo ezalaki komonana lokola ete ekoki kosalema te, mosala ya kosakola nsango malamu “kino nsuka na mokili.”—Mis. 1:8; Kols. 1:23.
4 Ndenge nini tokoki kolonga na mikolo na biso?: Biso mpe tobandaki mosala ya kosakola Bokonzi na molende nyonso atako mikakatano ezali mingi oyo moto akoki kokanisa ete ekosukisa biso. Bazali kopekisapekisa mosala na biso, bazali konyokola biso, kotya biso na boloko, mpe kosala biso makambo mosusu ya mobulu mpo tótika mosala na biso, kasi atako bongo tozali kolonga kaka. Ndenge nini? “‘Na nzela na makasi te, na nzela na nguya mpe te nde na elimo na ngai,’ Yehova na bibele alobi bongo.” (Zek. 4:6) Lokola Yehova azali na biso elongo, eloko moko te ekoki kokanga mosala na biso!—Lom. 8:31.
5 Ntango tozali kosakola, tozali ata na ntina moko te ya kozala nsɔninsɔni to ya kobanga to ya komiyoka ete tokoki te. (2 Kol. 2:16, 17) Tozali kutu nde na bantina ya solosolo ya kokende liboso na likambo ya kopalanganisa nsango malamu ya Bokonzi. Mpo na lisalisi ya Yehova, tokosala oyo “ekoki kosalema te!”—Luka 18:27.