‘Nsango malamu oyo ekosakolama’!
1. Nini ezali kondimisa biso ete eloko moko te ekoki kopekisa mosala ya kosakola?
1 Eloko moko te ekoki kopekisa Yehova akokisa mokano na ye. (Yis. 14:24) Atako na miso ya bato Mosambisi Gideone ná basoda na ye 300 bakokaki te kolonga basoda ya Midiane oyo bazalaki bato 135 000, Yehova alobaki na ye boye: “Okobikisa mpenza Yisraele na lobɔkɔ ya Midiane. Nazali nde kotinda yo te?” (Bas. 6:14) Yehova azali kotambwisa mosala nini na mikolo na biso? Yesu alobaki boye: “Nsango malamu oyo ya bokonzi ekosakolama na mabele mobimba esika bato bafandi.” (Mat. 24:14) Moto moko te akoki kopekisa mosala yango ekokisama!
2. Mpo na nini tokoki kondima ete Yehova akosalisa mokomoko na biso na mosala ya kosakola?
2 Yehova asalisaka mokomoko na biso: Tondimaka ete Yehova akosalisa Batatoli na ye bákokisa mosala ya kosakola; kasi, tokoki mpe kondima ete Yehova akosalisa mokomoko na biso? Na ntango moko oyo ntoma Paulo azalaki na mpasi, amonaki ndenge Yehova asalisaki ye na nzela ya Mwana na ye, Yesu. (2 Tim. 4:17) Tokoki mpe kondima ete Yehova akopambola milende ya mokomoko na biso mpo na kosala mokano na ye.—1 Yoa. 5:14.
3. Yehova asalisaka biso ntango tokutanaka na mikakatano nini?
3 Misala na yo ya mokolo na mokolo elɛmbisaka yo mingi mpe otikalaka na makasi te mpo na kosakola? “Apesaka nguya na moto oyo alɛmbi.” (Yis. 40:29-31) Ozali kokutana na minyoko to botɛmɛli? “Bwakelá Yehova ye moko mokumba na yo ya kilo, mpe ye moko akosunga yo.” (Nz. 55:22) Omonaka ntango mosusu ete okokoka te? “Kende, mpe ngai moko nakozala elongo na monɔkɔ na yo.” (Kob. 4:11, 12) Ozali na maladi oyo epekisaka yo osakolaka mingi? Yehova azwaka na motuya milende oyo osalaka na motema na yo mobimba mpe akoki kosalela yango, ata soki ezali moke.—1 Ko. 3:6, 9.
4. Soki tozali na kondima epai ya Yehova, yango ekotinda biso tósala nini?
4 Lobɔkɔ ya Yehova “esembolami, bongo nani akoki kozongisa yango nsima?” (Yis. 14:27) Lokola tozali na kondima ete Yehova azali kopambola mosala na biso, tókoba kosakola “na mpiko na bokonzi oyo euti na Yehova.”—Mis. 14:3.