Kokakatana te mpo na kosakola!
1 Ntango tomibongisi mpo na kokende kosakola ndako na ndako, mokakatano eleki monene oyo tokoki kozala na yango ezali makanisi oyo tomityeli na motó ete bakoyamba biso te. Soki tozali komiyoka ete tokokoka te, yango ekoki kosala ete tókakatana mpo na kokende koyebisa solo epai ya “bato ya lolenge nyonso.” (1 Tim. 2:4, NW) Kasi tosengeli kokakatana te mpo na kosakola nsango malamu. Mpo na nini?
2 Ezali nsango ya Yehova: Yehova ayebisi liloba na ye na kati ya Biblia. Ntango tozali komemela bato mosusu nsango yango, tozali komema nde makanisi na ye, kasi ya biso te. (Lom. 10:13-15) Ntango bato baboyi koyoka nsango ya Bokonzi, bazali mpenza nde koboya koyoka Yehova. Yango wana, ntina ezali te ete tólɛmba nzoto. Tozali mpenza na elikya ete nsango yango ekosimba malamumalamu mitema ya bato oyo bazali koluka ete mbongwana esalema na mokili mpe baoyo bazali komibanzabanza mpo na bamposa na bango ya elimo.—Ezek. 9:4; Mat. 5:3, 6.
3 Yehova azali kobenda bato: Lokola makambo ebongwanaka, moto oyo aboyaki koyoka biso liboso, akoki sikoyo koyamba biso mpo ete motema na ye ebongwani Yehova akoki sikoyo komonisela moto yango motema malamu na ye mpe ‘kobenda ye.’ (Yoa. 6:44, 65) Soki esalemi bongo, tosengeli kondima ete Yehova asalela biso mpe ete baanzelu bátambwisa biso mpo tókutana na bato ya motindo yango.—Emon. 14:6.
4 Nzambe apesaka biso elimo na ye: Elimo santu epesaka biso makoki ya kosakola “na mpiko na bokonzi ya Yehova.” (Mis. 14:1-3, NW ) Soki tomikundoli ete nguya yango esungaka biso na mosala ya kosakola, tokokakatana te mpo na koyebisa solo epai na bazalani na biso, baninga na biso ya mosala, baninga na biso ya kelasi, bandeko na biso, bato oyo batángá mingi to mpe oyo bazali na bozwi mingi.
5 Yesu ateyaki biso lolenge ya kosala: Yesu asalelaki mituna oyo ezalaki kotinda bato bákanisa, asalelaki bandakisa oyo azalaki kozwa na makambo oyo bato bayebi, azalaki kosolola na bango malamumalamu na lisalisi ya Makomami. Alimbolelaki bango solo na lolenge ya pɛtɛɛ, mpe mateya na ye ezalaki kobenda bato mpe kosepelisa bango; nyonso wana ezalaki kouta na motema na ye. Yango ezali mpe lolenge oyo eleki malamu ya kosala lelo oyo. (1 Kol. 4:17) Lolenge oyo tosakolaka ekoki kobongwana, kasi nguya ya nsango ya Bokonzi etikalaka kaka ndenge moko.
6 Tozali mpenza na libaku malamu ndenge Yehova azali kosalela biso mpo tósalisa bato na ndenge ya malamu koleka mpe oyo ekopesa bango matomba. Tiká ete tókakatana te mpo na kosakola! Tosengeli kozala na molende mpe tótika ete Yehova “[afungolela, NW] biso ekuke mpo na Liloba” ete tósakola nsango malamu epai na bato mosusu.—Kols. 4:2-4.