Biyano na mituna na bino

◼ Ntango tozali kopesa litatoli na telefone, tosengeli mpe kolobela makabo?

Ntango tozali liboso ya moto mpo na kopesa ye litatoli, tozalaka na likoki ya komonisa ete mosala ya Batatoli ya Yehova ya koteya Biblia na mokili mobimba esimbamaka na makabo. Nzokande, tokolobela te likambo ya kopesa makabo na telefone, mpamba te yango ekoki kopesa likanisi ya kosɛnga mbongo. Mosala ya Batatoli ya Yehova ezalaka mombongo te.​—2 Kol. 2:17.

◼ Ntango tozali kopesa litatoli na telefone, tokosala nini soki moto aboi ete Batatoli bábenga ye lisusu te na telefone?

Esengeli kotosa oyo moto yango alobi. Tokokoma mwa nɔti moko oyo ekozala na dati mpe nkombo ya moto yango mpe tokotya yango na anvɛlɔpi ya teritware yango mpo basakoli bábenga lisusu na nimero yango te. Mbala moko na mbula, esengeli kotalela liste ya bato oyo baboyaki ete Batatoli bábenga bango na telefone. Mokɛngɛli ya mosala ya kosakola akopona basakoli ya makoki, baoyo bazali na takte mpo bákende kotala bato yango mpe koyeba soki bazali kaka koboya ete Batatoli bábengaka bango na telefone.​—Talá Biyano na mituna na bino na Mosala na biso ya Bokonzi ya sanza ya Yuli 1994.