Koyangana na makita nyonso—Likambo moko ya ntina mingi
1 Baklisto ná mabota na bango bamonaka ete koyangana na makita nyonso ezali na ntina mingi. Kasi, misala mosusu oyo bato bazali kosala lelo ekoki kopekisa bato mosusu na koyangana na makita nyonso. Misala ya ndako, misala oyo tosalaka mpo na kozwa mbongo to mpe badevuare ya kelasi, ekómi nde kozwa mokemoke ntango ya losambo ya Yehova? Soki tozali kotalela makambo ndenge Yehova atalelaka yango, yango ekosalisa biso tótya ntango nyonso makambo eleki ntina na esika ya liboso.—1 Sam. 24:6, NW; 26:11, NW.
2 Moyisalaele moko aboyaki na nko kotalela makambo ndenge Yehova azalaki kotalela yango, mpe akendeki kolɔkɔta nkoni na mokolo ya Sabata. Mbala mosusu akanisaki ete azali se koluka kokokisa bamposa ya libota na ye to ezali kaka mwa likambo ya moke. Kasi, etumbu oyo Yehova apesaki moto yango emonisaki ete kosala makambo mosusu na ntango ya losambo ya Yehova ezali likambo moko monene.—Mit. 15:32-36.
3 Ndenge ya kosala mpo na kozangisaka makita te: Mpo na bato mingi, kokata mosala mpo na koyangana na makita ezalaka etumba mpenza. Mpo bázangaka makita te, basusu basololaki na bapatrɔ na bango, to bayokanaki na baninga na bango ya mosala; basusu balukaki mosala oyo ekopesa bango nzela ya koyanganaka na makita, to batikaki bomoi ya mindɔndɔ. Na ntembe te, komipimela makambo mosusu ndenge wana mpo na losambo ya solo esepelisaka mpenza Nzambe.—Ebe. 13:16.
4 Badevuare ya kelasi ekoki mpe kobimisa mokakatano. Elenge moko alobaki boye: “Nabandaka kosala badevuare na ngai liboso ya kokende na makita mpe nayaka kosilisa yango soki nazongi.” Soki bana basilisi badevuare nyonso te na mpokwa ya mokolo ya makita, baboti mosusu balimbolelaka balakisi ete koyangana na makita ezali likambo moko ya ntina mingi na libota na bango.
5 Libota mobimba bakoki kosilisa misala ya ndako, komibongisa mpe kokóma bango nyonso na ngonga ya malamu na makita soki bazali na programɛ ya malamu mpe bazali kosalisana. (Mas. 20:18) Baboti bakoki koteya ata bana na bango ya mike ete na ntango boye basengeli kosilisa kolata mpe komibongisa mpo na kokende na makita. Baboti bakoki kosalisa bana na bango bákanga ntina ya makita soki bango moko bazali kopesa ndakisa malamu.—Mas. 20:7.
6 Lokola mikakatano ya mokili oyo ezali se kobakisama, ezali na ntina mingi ete tóyanganaka na makita nyonso. Tiká ete tólanda kotalela makambo ndenge Yehova atalelaka yango, mpe koyangana na makita ezala likambo moko ya ntina mingi na bomoi na biso.—Ebe. 10:24, 25.