Mateya oyo ememaka na bomoi
1 Ezalaka mpenza esengo komona miso ya moto ezali kongɛnga mpo akangi ntina ya solo ya Liloba ya Nzambe! Kosalisa basusu báyeba Nzambe mpe mikano oyo azali na yango mpo na bato, ezalaka likambo ya esengo mpenza. Mateya ya ndenge wana ekoki komema moto na bomoi ya seko.—Yoa. 17:3.
2 Ntina oyo mateya yango eleki mateya nyonso: Lelo oyo, bato bazali koteyama na banzela mingi mpe na makambo ndenge na ndenge. (Mos. 12:12) Kasi, mateya yango ekokani ata moke te na “makambo minene ya Nzambe.” (Mis. 2:11) Mateya oyo bato bazali kozwa na mokili, esalisi bango mpenza bápusana ata mwa moke penepene na Mozalisi mpe báyeba mokano na ye? Esalisi mpenza bato báyeba nini ekómelaka biso soki tokufi to báyeba ntina oyo bampasi ekómi mingi? Mateya yango, epesi nde bato elikya? Esalisi bango bázala na mabota ya malamu? Te. Ezali kaka na nzela ya mateya oyo euti na Nzambe nde tokoki kozwa biyano na mituna ya ntina mingi oyo etali bomoi.
3 Mateya ya Nzambe ezali kopesa bato eloko oyo na mawa nyonso ezali komonana na mokili ya lelo te—bizaleli malamu. Liloba ya Nzambe epikolaka bizaleli mabe lokola koyina bato ya mposo mosusu, ya monɔkɔ mosusu, mpe bolingo ya bikólo, na mitema ya bato oyo bandimi mateya yango mpe bazali kosalela yango. (Ebe. 4:12) Liloba ya Nzambe esalisi bato bátika makambo nyonso ya mobulu mpe ‘bálata bomoto ya sika.’ (Kols. 3:9-11; Mik. 4:1-3) Lisusu, Mateya oyo euti na Nzambe esalisi bamilio ya bato bábwaka bizaleli mpe misala oyo bamipesaki na yango, oyo esepelisaka Nzambe te.—1 Kol. 6:9-11.
4 Mpo na nini kosala yango na lombangu mpenza sikoyo: Molakisi na biso Monene azali komonisa biso ntina ya makambo oyo tozali komona lelo oyo. Bisakweli na Ye ya kosambisa ezali na makambo oyo etaleli mpenza mikolo na biso, oyo esengeli kosakolama na mabelé mobimba. (Emon. 14:6, 7) Klisto azali koyangela na likoló, lisangá ya mangomba ya lokuta na mokili mobimba etikali moke ebebisama, mpe mosika te Bokonzi ya Nzambe ekobebisa baguvɛrnema nyonso oyo ezali awa na mabelé. (Dan. 2:44; Emon. 11:15; 17:16) Na bongo, ezali likambo ya lombangu mpenza ete bato bándima Mokonzi oyo Nzambe atye mpo na koyangela, bábima na Babilone Monene, mpe bábelela nkombo ya Yehova na kondima mpenza. (Nz. 2:11, 12; Lom. 10:13; Emon. 18:4) Tiká ete tósala nyonso oyo tokoki mpo na koyebisa basusu mateya oyo ememaka na bomoi ya seko.