Monisá ete osepelaka na bato​—Na komityáká na esika na bango

¹ Atako Yehova azali moyangeli ya molɔ́ngɔ́ mobimba, asalelaka bato ya kozanga kokoka makambo na boboto mpe amityaka na esika na bango. (Gen. 13:14; 19:18-21, 29) Tokoyebisa bato nsango malamu lisusu malamu koleka soki tozali komitya na esika na bango, ndenge Nzambe asalaka. (Kols. 4:6) Yango elingi koloba ete tosengeli kosuka kaka te na koloba na limemya.

² Ntango tozali kosakola ndako na ndako: Tokosala nini soki tokei kotala moto na ntango oyo ebongi te to ntango azali na mosala mingi? Na ntango wana, ekozala malamu tósala lisolo ya mokuse to tóyebisa ye ete tokozongela ye nsima. Soki tozali na boboto, tokoboya kotya bato mbamba bázwa mikanda na biso ata soki baboyi yango. Soki tozali komitya na esika ya basusu, tokozala mpe na limemya mpo na lopango na bango, na ndakisa tokokanga lopango soki tokɔti to tobimi, mpe tokoteya bana na biso básalaka mpe bongo. Tokosala nyonso ete bato mosusu bámona te mikanda oyo totikeli bato oyo tokuti bango na ndako te. Lisusu, soki tozali komitya na esika ya basusu, tokosalela bango makambo ndenge tokolinga básalela biso.​—Luka 6:31.

³ Ntango tozali kosakola na balabala: Ntango tozali kosakola na balabala, tokomonisa ete tozali na limemya soki tozali kokanga nzela te mpe tozali kotɛlɛma te liboso ya biloko oyo bato bazali kotɛka. Tokomonisa mpe ete tozali komitya na esika ya basusu soki tozali koluka kosolola na bato oyo bazali na mwa ntango, na esika ya kosolola na baoyo tomoni polele ete bazali na ntango te. Ntango mosusu, ekosɛnga tóloba mwa makasi na esika oyo makɛlɛlɛ ezali mingi, atako bongo tosengeli koloba na ndenge ebongi, mpe na komilakisa te.​—Mat. 12:19.

⁴ Ntango tozali kopesa litatoli na telefone: Soki tozali komitya na esika ya basusu, tokopesa bango litatoli na telefone na esika oyo makɛlɛlɛ ezali mingi te. Tokomonisa limemya soki toyebisi moto mbala moko soki tozali nani mpe tobengi ye mpo na nini. Tokosolola na bato masolo ya kolendisa na Makomami, soki tozali kotya monɔkɔ malamu na telefone mpe koloba na mongongo oyo ebongi. (1 Kol. 14:8, 9) Soki tozali na boboto, tozali komitya na esika ya basusu, mpe tozali komonisa limemya na makambo ndenge na ndenge oyo touti kolobela, tozali komekola Yehova Nzambe na biso oyo amityaka na esika ya bato.