Biso nyonso tokoki kopesa mabɔkɔ mpo na kosalisa moto akóma moyekoli ya Klisto
1 Mpo moto akóma moyekoli ya Klisto, esɛngaka kaka milende ya mosakoli moko te. Yehova akoki kosalela bato nyonso “oyo bazali kosala elongo na” ye mpo básalisa bayekoli ya Biblia bákola na elimo. (1 Kol. 3:6-9) Mokomoko na biso asalisaka bato ya sika na biyano oyo apesaka na motema mobimba na makita, mpe lisusu na etamboli na ye ya malamu oyo emonisaka mpenza ete elimo ya Nzambe ezali kosala na bomoi na ye. (Yoa. 13:35; Gal. 5:22, 23; Ef. 4:22, 23) Tokoki kosala lisusu nini mpo na kosalisa bato ya sika?
2 Lisangá mobimba: Biso nyonso tokoki komonisa ete tosepelaka na bato oyo babandi koyangana na makita soki tozali kopesa bango mbote na esengo mpe kosolola na bango liboso mpe nsima ya makita. Mobali moko akanisaki mbala na ye ya liboso oyo akendaki na makita ya lisangá, mpe alobaki boye: “Atako nayebaki bato yango te, kasi na mokolo moko mpamba, namonaki ete bazali mpenza bato ya bolingo koleka bato nyonso nakutaná na bango na lingomba oyo nakolá. Namonaki mpenza ete nazwi solo.” Sanza nsambo na nsima, azwaki batisimo.
3 Pesáká moyekoli ya Biblia longonya oyo ebongi soki azali kokola na elimo. Moyekoli yango azali koyika mpiko na botɛmɛli? Ayanganaka na makita nyonso? Asalaki makasi apesa eyano? Asili kopesa nkombo na Eteyelo ya mosala ya Teokrasi to abandi kosakola? Pesá ye longonya ndenge azali kokola. Yango ekolendisa ye mpenza.—Mas. 25:11.
4 Mosakoli oyo ayekolaka na ye: Basakoli mosusu basalisaka bato oyo bayekolaka na bango Biblia bámesana na bandeko ya lisangá na ndenge basɛngaka basakoli oyo bazali ndakisa malamu bákende elongo na bango koyekola na bato yango. Bengisá moyekoli ya Biblia na makita ya lisangá kaka ntango obandi koyekola na ye. Ntango abandi koyangana na makita, salá makasi olakisa ye epai ya bandeko mosusu ya lisangá. Moto yango azali kosala makasi atika momeseno moko ya mabe, na ndakisa komɛla likaya? Moto moko ya libota na ye azali kopekisa ye koyekola Biblia? Akolendisama soki asololi na mosakoli moko oyo akutanaki mpe na mikakatano ya ndenge wana mpe alongaki yango.—1 Pet. 5:9.
5 Bato ya sika bazalaka na mposa ete bandeko ya lisangá básalisa bango na elimo. Biso nyonso tokosalisa bango bákola na elimo soki tozali komonisa bango mpenza ete tosepelaka na bango.