Okoki kokóma na bozwi!
1. Mpo na nini osengeli kotala soki okoki kokóma mobongisi-nzela ya sanza na sanza?
1 Olingaka kozala na esengo mingi mpe na bomoi oyo ezali mpenza na ntina? Osepelaka kosalisa basusu? Ozalaka na mposa ya komipesa lisusu mingi na mosala ya Yehova? Soki eyano na yo ezali ɛɛ na moko ya mituna wana, osengeli kotala soki okoki kokóma mobongisi-nzela ya sanza na sanza. Ntango ozali kotalela likambo yango, kobosana te mikumba ya libota, mikumba mosusu oyo Makomami epesi yo, maladi mpe mikakatano ya nzoto oyo okoki kozala na yango.
2. Tángá mwa ndambo ya bozwi ya elimo oyo babongisi-nzela ya sanza na sanza bazalaka na yango.
2 Salomo apemamaki na Nzambe mpe akomaki ete lipamboli ya Yehova ememaka mpe bozwi ya mosuni. (Mas. 10:22) Lelo oyo, lipamboli ya Yehova epesaka biso libosoliboso bozwi ya elimo. Babongisi-nzela ya sanza na sanza bazwaka bozwi yango mingi. Na ndakisa, bayokaka mpenza esengo ya kopesa na ndenge ‘basombaka ntango’ oyo balingaki kosala makambo na bango moko mpo na kosalisa basusu. (Kols. 4:5; Mis. 20:35) Yehova amonaka mosala makasi oyo basalaka na bolingo mpenza mpe asepelaka na yango. “Biloko ya motuya” wana oyo bamibombelaka na likoló ekosila valɛrɛ te. (Mat. 6:20; Ebe. 6:10) Lisusu, lokola babongisi-nzela bazalaka na ‘liso alima’ mpe batyelaka Yehova motema ete akokokisa bamposa na bango, boyokani na bango na ye ekómaka makasi.—Mat. 6:22, 25, 32; Ebe. 13:5, 6.
3. Bokeseni nini ezali kati na koluka bozwi ya elimo ná koluka bozwi ya mosuni?
3 Mbala mingi, koluka bozwi ya mosuni ememaka na “bamposa mingi ya bozoba mpe oyo eyokisaka mpasi.” (1 Tim. 6:9, 10; Yak. 5:1-3) Kasi, ezalaka bongo te mpo na lipamboli ya Yehova. Lokola babongisi-nzela ya sanza na sanza basalelaka ntango na bango mingi mpo na kosakola, yango esalisaka bango bázala na bokatikati na makambo ya elimo mpe bámipesa na makambo oyo eleki ntina. (Filp. 1:10) Ndeko mobali moko atikaki mosala na ye ya ingénieur oyo ezalaki kozwa ye ntango mingi mpo akóma mobongisi-nzela. Alobaki boye: “Namonaki ete mosala na ngai ezalaki komemela ngai mitungisi mingi. Kasi, ezali bongo te mpo na mosala ya mobongisi-nzela. Lelo oyo, nazali kosalisa bato mpe koteya bango mateya ya solo. Yango esepelisaka ngai mingi.”
4. Mapamboli nini babongisi-nzela ya sanza na sanza bazwaka na ndenge basalisaka basusu?
4 Bamemelaka basusu mapamboli: Lelo oyo, biso nyonso tozali kobika na “bantango ya ndenge mosusu mpe ya mpasi mpenza.” (2 Tim. 3:1) Bisika nyonso, bato bazali na mposa makasi ya kozwa elikya. Basakoli ya Bokonzi basepelaka mingi komona moto oyo azalaki mawamawa mpo azangi elikya akómi na esengo mpo andimi nsango malamu. Babongisi-nzela ya sanza na sanza bazalaka na esengo mingi koleka na ndenge basakolaka ngonga koleka 800 mbula na mbula na mosala wana oyo ebikisaka bomoi ya bato!—1 Tim. 4:16.
5, 6. Nini ekoki kosalisa yo okóma mobongisi-nzela ya sanza na sanza?
5 Osilá kokanisa malamumalamu soki okoki kokóma mobongisi-nzela ya sanza na sanza? Ntango mosusu, ekosɛnga ete ‘omisombela ntango ebongi,’ oyo olekisaka na makambo oyo ezali na ntina mingi te. (Ef. 5:15, 16) Basakoli mingi basali yango; mingi bayeisi bomoi na bango pɛpɛlɛ mpe bakitisi ntango oyo bazalaki kolekisa na mosala ya mosuni mpo na komipesa mingi na makambo ya elimo. Yo mpe okoki kolanda lokolo na bango?
6 Sɛngá Yehova apesa yo bwanya mpo osala programɛ ya malamu. (Yak. 1:5) Mapamboli nini okozwa? Okozwa ebele ya bozwi ya elimo! Lisusu, Yehova akopambola yo na mosuni mpe akopesa yo biloko oyo osengeli na yango. (Mat. 6:33) Baoyo bakomeka Yehova ndenge wana, bakozwa “lipamboli kino esika ekozanga mpo na yango.”—Mki. 3:10.