Mokanda ya Biro

Bandeko basakoli ya Bokonzi,

Tozali na esengo mingi ya kopesa bino lapolo ya mosala ya kosakola ya sanza ya Marsi 2008. Na Congo-Kinshasa, basakoli bakómaki 150 309. Ezali mbala ya liboso basakoli koleka 150 000 bápesa lapolo ya mosala ya kosakola na sanza moko na Congo-Kinshasa. Longola yango, motángo ya ngonga, ya boyekoli ya Biblia, mpe ya makambo mosusu oyo etali mosala ya kosakola, ebakisamaki mpenza. Lisusu, tozali na esengo ya komona ete Congo-Brazzaville ekómaki na basakoli ya molende 5 174, oyo balekisaki ngonga 122 365 na mosala ya kosakola. Tolingi mpenza kopesa bino nyonso longonya na ndenge bozali kosala milende mpenza mpo na kosakola nsango malamu.​—⁠1 Kol. 15:⁠58.

Misala ya kotonga na Betele ezali kotambola malamu. Na mokolo ya 28 Aprili 2008, libota ya Betele bazalaki na esengo ya kobanda kosalela ndako ya kolya mpe kuku ya sika. Ndako ya sika ya kolya eleki oyo ya liboso na monene mbala mibale, mpe ezali na bisika ya kofanda 600.

Na mokolo ya 23 Febwali 2008, tosalaki molulu ya kofungola Ndako ya Mayangani oyo ezali na Limete, na Kinshasa. Bayangani nyonso bandimaki na esengo mpenza ete ndako yango esalelama mpo na lokumu ya Yehova, mpe bakobanda kopesa makabo mpo na kobatela yango. Na Yuli, tosilisaki kotonga Ndako mosusu ya Mayangani na Kisangani, mpe mosusu ekotongama na Lubumbashi mpe na Mbuji-Mayi. Lisusu, molulu ya kofungola Ndako ya Mayangani esalemaki na Beni na Febwali 2008 mpe na Butembo na Aprili 2007. Tozali na esengo ndenge bandako yango ezali kosalelama mpo na lokumu ya Yehova.

Tiká ete tókoba kotɛlɛma ngwi wana tozali kozela kobikisama ya Yehova, oyo ekómi pene mpenza.

Bandeko na bino,

Biro ya filiale ya Congo-Kinshasa