Tóteya baoyo bayebi kotánga malamu te
1. Mokakatano nini tokoki kokutana na yango na mosala ya kosakola?
1 Na mosala ya kosakola, ntango mosusu tokutanaka na mokakatano ya koteya solo epai ya bato oyo bayebi kotánga malamu te. Tokoki kosala nini?
2. Ndenge nini mpe mpo na nini tosengeli komemya bato oyo bayebi kotánga malamu te?
2 Tómemya bango: Eloko eleki ntina na miso ya Yehova ezali nde motema ya moto, kasi te kelasi oyo moto atángá. (1 Sam. 16:7; Mas. 21:2) Yango wana, tosengeli te kotyola bato oyo bayebi kotánga malamu te. Bato ya ndenge wana bakoki kondima tósalisa bango soki tozali komemya bango mpe komonisela bango motema molai. (1 Pet. 3:15) Yango elingi koloba ete tosengeli te kotinda moto ya ndenge wana na makasi atánga vɛrsɛ to paragrafe. Ntango moto azali kokola na boyebi ya solo ya Biblia, akómaka na mposa makasi ya koyeba kotánga malamu mpo ayoka esengo ya kotánga Liloba ya Nzambe mpe ‘kokanisa yango butu na moi.’—Nz. 1:2, 3.
3. Mayele nini tokoki kosalela mpo na koteya bato oyo bayebi kotánga malamu te?
3 Ndenge ya koyekola na moto oyo ayebi kotánga malamu te: Bililingi esalisaka biso tóteya malamu mpe esalisaka bato bábosana te makambo oyo bayekoli. Okoki kosɛnga moyekoli alimbola elilingi moko oyo ezali na buku oyo bozali koyekola. Na nsima, tuná ye mituna oyo ekosalisa ye ayeba liteya oyo elilingi yango epesi. Salelá bavɛrsɛ oyo ebimisi liteya oyo olingi konyata mpo na kolimbola elilingi yango. Okoki mpe kosalela bililingi mpo na kozongela makambo oyo boyekoli. Koyekola na moto yango makambo mingi na mbala moko te. Zongeláká motó ya likambo mpe makanisi ya ntina ya liteya, mpe kokɔtisa te makanisi mosusu oyo ezali na liteya wana te. Tángáká bavɛrsɛ mbala moko na kati ya Biblia, mpe tunáká moyekoli mituna mpo na koyeba soki akangi ntina ya makambo oyo otángi. Kosala bongo ekoki kopesa ye mposa ya koluka koyekola kotánga malamu, mpo ye moko ayeba mateya mosusu ya solo oyo ezali na Biblia.
4. Ndenge nini tokoki kosalisa moyekoli ya Biblia ayeba kotánga malamu?
4 Lisalisi mpo na koyeba kotánga malamu: Bato oyo bayebi kotánga malamu te to oyo bazwá te libaku ya koyekola kotánga malamu bakoki koyeba makambo mingi mpe kokanga ntina na yango. Okoki kolendisa bato ya ndenge wana báyokaka bakasɛti to ba CD ya mikanda na biso. Koyoka malamu ndenge bazali kotánga na kasɛti to na CD mpe kolanda na mokanda, ata mpe kozongela maloba na mongongo ya nse, ekoki kosalisa moto ayeba kotánga malamu. Mwa buku Omipesa na kotánga mpe kokoma ekoki mpe kosalisa ye. Na masangá mosusu, bankulutu bakoki mpe kobongisa kelasi ya koyekola kotánga. Bokoki kosalela malako wana mpo na kosalisa bato oyo bayebi kotánga malamu te bákanga ntina ya “makomi mosantu” oyo ekoki kokómisa bango bato ya bwanya mpo na lobiko.—2 Tim. 3:15.