Ndenge ya kosalisa baoyo bazali na mokakatano ya kotánga

1. Koyekola Biblia na bato oyo bayebi kotánga malamu te ezalaka na mokakatano nini?

¹ Bato oyo bazali na mokakatano ya kotánga bakoki kosepela na makambo ya elimo, kasi bakoki kobanga kotánga Biblia mpe mikanda mosusu. Kopesa bato ya ndenge wana buku Biblia eteyaka, mingimingi na ebandeli, ekoki kobimisa mpenza matomba te. Ndenge nini tokoki kosalisa bango na elimo? Totunaki basakoli ya mikili koleka 20 oyo bamesani na mosala ya kosakola ndenge oyo basalaka. Makanisi na bango ezali awa na nse.

2. Bisaleli nini ebongi mpo na kosalisa bato oyo bazali na mokakatano ya kotánga?

² Soki moyekoli ayebi kotánga malamu te to mpe ayebi kotánga te, okoki kobanda na mwa buku Yoká Nzambe to Yoká Nzambe mpo ozala na bomoi ya seko. Mobongisi-nzela moko na États-Unis alakisaka moto mwa bakuku yango nyonso mibale mpe asɛngaka ye apona oyo ebongi na ye. Biro ya filiale ya Kenya eyebisi ete bisaleli yango ezali kobimisa matomba mingi mpamba te na Afrika, bato bamesaná koteyama na nzela ya masolo oyo babɛtelaka bango, na esika ya koyekola na bango na mituna mpe biyano. Ekoki kozala mpasi te mpo na moto oyo atángá kelasi andima kotánga mpe kopesa biyano na mituna; nzokande, kosala bongo ekoki koyokisa moto oyo atánga kelasi mingi te nsɔni. Soki moyekoli ayebi kotánga mwa moke, basakoli mingi basepelaka kobanda na ye na mwa buku Nsango malamu oyo euti na Nzambe! to Okoki kozala moninga ya Nzambe!, to mpe Mokanda mpo na masolo ya Biblia.

3. Makambo nini tosengeli koyeba mpo na bato oyo bayebi kotánga te, oyo ekosalisa biso tóteya bango malamu?

³ Pesáká longonya: Bato oyo bayekolá kotánga te bakoki koyoka nsɔni mpe mingi na bango bakoki komimona ete bazali na valɛrɛ mingi te. Mbala mingi mpo na koteya bango solo, tosengeli liboso kosalisa bango bálongola nsɔni. Bato mingi oyo bayebi kotánga te bazalaka mayele mpe bazali na likoki ya koyekola. Moniselá bango limemya oyo ebongi na bango mpe pesá bango lokumu. (1 Pe. 3:15) Bakokóma na mposa ya kokoba koyekola soki bamoni ete milende na bango ezali kobimisa matomba mpe bazali kokende liboso na elimo. Na yango, kokakatana te kopesaka bango longonya.

4. Ndenge nini tokoki kolendisa bato oyo bayebi kotánga malamu te bábongisaka boyekoli?

⁴ Ata soki moyekoli ayebi kotánga malamu te, lendisá ye abongisaka boyekoli. Na Afrika ya Sudi, basakoli mosusu balendisaka bato oyo bayekolaka na bango básɛnga ndeko moko ya libota to moninga oyo ayebi kotánga malamu asalisa bango. Mosakoli moko na Grande-Bretagne alendisaka bato oyo ayekolaka na bango Biblia ete bámibongisaka. Ntango bazali koyekola, apesaka moyekoli buku na ye mpo amona ndenge ezalaka pɛtɛɛ kozwa biyano ntango batye mikɔlɔtɔ na biyano yango. Asalaka bongo kaka mpo na mwa baparagrafe. Ndeko mobali moko na Inde alendisaka bato oyo ayekolaka na bango Biblia bátala liboso bililingi oyo ezali na liteya oyo bakoyekola na pɔsɔ ezali koya mpe bámanyola na yango.

5. Ndenge nini tokoki komonisa motema molai ntango tozali koyekola na moto?

⁵ Zalá motema molai: Ezala mokanda nini bozali koyekola, bendá likebi na makanisi ya ntina mpe salisá moyekoli akanga ntina na yango malamu. Na ebandeli, ekozala malamu bóyekola kaka miniti 10 to 15. Koluka te koyekola na moto yango baparagrafe mingi na mbala moko; mwa ndambo ya paragrafe ekoki. Zalá motema molai soki moyekoli azali kotánga malɛmbɛmalɛmbɛ. Na ntembe te, akobongisa lolenge na ye ya kotánga ntango bolingo na ye mpo na Yehova ekokola. Mpo na kosalisa moyekoli asala bongo, ekozala malamu obengisa ye na makita kaka na ebandeli.

6. Ndenge nini tokoki kosalisa bato báyeba kotánga?

⁶ Soki bayekoli ya Biblia bayekoli kotánga, bakokola noki na elimo. (Nz. 1:1-3) Basakoli mingi basalisaki bato oyo bayekolaki na bango na nzela ya mwa buku Omipesa na kotánga mpe kokoma; bazalaki kozwa mwa miniti nsima ya koyekola mpo na kotalela mwa buku yango. Soki moyekoli alɛmbi nzoto, ntango mosusu okoki kolobela likambo moko oyo ayekolaki kosala mpo na kolendisa ye. Monisá ye ete Yehova akopambola milende na ye mpe lendisá ye abondela Yehova asalisa ye. (Mas. 16:3; 1 Yoa. 5:14, 15) Na Grande-Bretagne, basakoli mosusu balendisaka bato oyo bayekolaka na bango bámityela mikano oyo ekoki na bango, oyo bakobanda kokokisa mokemoke. Na ndakisa, koyeba alfabɛ malamu, koyeba esika bavɛrsɛ mosusu ezalaka mpe kotánga yango, mpe kotánga mikanda oyo elimbolaka Biblia oyo ekomami na elobeli ya pɛtɛɛ. Mbala mingi, kosalisa bato báyeba kotánga esɛngaka kolendisa bango básepela kosala yango, kasi kaka te koteya bango ndenge ya kosala yango.

7. Mpo na nini tosengeli koboya te koyebisa mateya ya solo epai ya baoyo bazali na mokakatano ya kotánga?

⁷ Yehova atyolaka te bato oyo batánga kelasi mingi te. (Yobo 34:19) Atalatalaka nde na kati ya motema ya moto. (1 Nt. 28:9) Na yango, koboya te koyebisa mateya ya solo epai ya bato oyo bazali na mokakatano ya kotánga. Ozali na bisaleli mingi ya malamu oyo okoki kobanda na yango. Nsukansuka, okoki kokɔtisa moyekoli na buku Biblia eteyaka, mpe kosalisa ye akanga malamu ntina ya mateya ya Biblia.