Tósakola na molende!
1. Toli nini ya Paulo tosengeli kotyela likebi na mikolo na biso?
1 “Sakolá liloba, salá yango na molende.” (2 Tim. 4:2) Mpo na nini toli wana ya Paulo ezali na ntina mingi na mikolo na biso? Ndenge nini maloba yango etaleli bomoi na biso mpe ya basusu?
2. Mpo na nini tolukaka na molende bato oyo bayoki naino te nsango malamu?
2 Bomoi ya bato ezali na likama: Na mokili mobimba, bamilio ya bato bayoki naino te nsango malamu oyo ekoki kobikisa bango. (Rom. 10:13-15; 1 Tim. 4:16) Tokutaka bato mingi ya mitema sembo ata na bateritware oyo esakolamaka mingi. Soki tozali kosakola na bateritware ya ndenge wana na mikolo to bangonga mosusu, tokoki kokutana na moto oyo tosakwelá ye naino te. Soki tozali na molende mpo na koluka bato ya ndenge wana, tokozala na lisosoli ya pɛto mpe tokozala na nyongo ya makila te.—Mis. 20:26.
3. Ndenge nini tokoki kosalela malamu ntango na biso na mosala ya kosakola?
3 Atako bakristo ya ekeke ya liboso bakutanaki na botɛmɛli makasi, ‘batondisaki Yerusaleme na mateya na bango.’ (Mis. 5:28) Biso mpe tozali na ekateli ya “kopesa litatoli malamumalamu” lokola bango? (Mis. 10:42) Ntango tobimi na mosala ya kosakola, tosalelaka malamu ntango na biso? Soki tobimi basakoli mingi na motuka, tokitaka na motuka mpo na kopesa baleki-nzela litatoli mpo tóbungisa te ntango oyo tozali kozela basakoli mosusu oyo bazongeli moto moko oyo asepelaki?
4. Ndenge nini kosakola na molende esalisaka biso tósɛnzɛla?
4 Kosakola esalisaka biso tókoba kosɛnzɛla: Lokola nsuka ya mokili oyo ekómi pene, tosengeli kozala ekɛngɛ mpe kosɛnzɛla. (1 Tes. 5:1-6) Soki tozali ntango nyonso koyebisa bato elikya ya Bokonzi, makambo ya ntango oyo ekokómisa biso kilo te. (Luka 21:34-36) Lisusu, soki tozali kobatela “na makanisi” mokolo ya Yehova, yango ekosalisa biso tóbakisa molende na mosala oyo ezali kobikisa bomoi ya bato.—2 Pe. 3:11, 12.
5. Limemya mpo na bomoi ekotinda biso tósakola ndenge nini?
5 Soki tozali kosakola na molende, tokomonisa ete totalelaka bomoi ndenge Yehova atalelaka yango. Yehova “alingi moto ata moko te abomama kasi alingi nde bato nyonso bábongola motema.” (2 Pe. 3:9; Ezk. 33:11) Tiká tózala na ekateli ya kopesa bato mingi litatoli na teritware na biso mpo na lokumu ya Yehova!—Nz. 109:30.