Ndenge ya kolakisa bazulunalo

(Soki zulunalo ya Lingala ezali te bósalela ya Lifalanse)

Linɔ́ngi ya Mosɛnzɛli 1 Sɛtɛmbɛ

“Ntango mosusu bato basalaka makambo mabe mpo bateyamaki mabe na lingomba na bango. Mpo na yo, nini esalaka ete bákosama bongo? [Tiká ye apesa eyano.] Yoká oyo Biblia ezali kolendisa biso tósala. [Tángá 1 Yoane 4:1.] Lisolo oyo emonisi ntina ya kotalela bindimeli na biso mpo na koyeba soki ekokani na oyo Liloba ya Nzambe elobi.” Limbolá na mokuse lisolo oyo ebandi na lokasa 10.

Lamuká! Sɛtɛmbɛ

Tángá Matai 5:39. Na nsima lobá boye: “Okanisi ete Yesu alingaki koloba ete soki basali biso mabe tófanda nyɛɛ? [Tiká ye apesa eyano.] Lisolo oyo emonisi oyo Biblia elobi mpo na ndenge ya komibatela mpe koluka lisalisi ya Leta soki basali biso mabe.” Limbolá na mokuse lisolo oyo ebandi na lokasa 10.

Linɔ́ngi ya Mosɛnzɛli 1 Ɔkɔtɔbɛ

“Na mokili mobimba, bato ya mangomba nyonso babondelaka. Okanisi ete Nzambe ayokaka mpenza mabondeli mpe ayanolaka yango? [Tiká ye apesa eyano.] Biblia ezali kolendisa biso tóbondelaka. [Tángá Bafilipi 4:6, 7.] Zulunalo oyo ezali na biyano oyo Biblia epesi na mituna nsambo oyo bato bamitunaka na ntina ya libondeli.”

Lamuká! Ɔkɔtɔbɛ

“Toyokaka mbala mingi masolo ya bato oyo balongani na bango, bato ya politiki mpe bato mosusu bakosaki. Okanisi ete ekómi mpasi kozwa bato oyo tokoki kotyela motema? [Tiká ye apesa eyano.] Bato mingi bakanisaka ete vɛrsɛ oyo ezali kokokisama. [Tángá 2 Timote 3:1-5.] Zulunalo oyo emonisi epai tokoki kokuta bato oyo tokoki kotyela motema.”