Komanyola ezali na ntina mingi mpo na kosakola na molende
1. Nini esalisaki Yesu alongola likebi na ye te na mosala na ye ya libosoliboso?
1 Yesu autaki kolekisa mpokwa mobimba na kobikisa bato ya maladi mpe kobimisa bademo. Mokolo oyo elandaki, ntango bayekoli na ye bamonaki ye, bayebisaki ye: “Bato nyonso bazali koluka yo,” mpo na kolendisa ye akoba na misala na ye ya nguya. Kasi, Yesu alingaki te misala wana elongola likebi na ye na mosala na ye ya libosoliboso, oyo ya kosakola nsango malamu. Ayanolaki boye: “Tókende epai mosusu, na bamboka ya pembeni, mpo nasakola mpe kuna, mpamba te ezali mpo na yango nde nabimaki.” Nini esalisaki ye atya makanisi na ye nyonso na mosala ya kosakola? Alamukaki ntɔngɔntɔngɔ mpo na kosambela mpe komanyola. (Mrk. 1:32-39) Ndenge nini komanyola ekoki mpe kosalisa biso tózala basakoli ya molende?
2. Likoló ya makambo nini tosengeli komanyola mpo tókoba kosakola na molende?
2 Komanyola likoló ya nini? Yesu amonaki ete bato “banyokwamaki mpe basundolamaki lokola bampate oyo ezangá mobateli.” (Mat. 9:36) Biso mpe, tokoki komanyola mpo na ndenge oyo bato basengeli na nsango malamu. Tokoki mpe komanyola mpo na ndenge oyo mikolo etikali ya kotánga. (1 Ko. 7:29) To mpe tokoki komanyola mpo na misala ya Yehova mpe bizaleli na ye, mpo na libaku malamu oyo tozali na yango ya kozala Batatoli ya Yehova, mpe mpo na biloko ya motuya ya elimo oyo toyekolá na Liloba ya Nzambe, oyo bato mingi ya teritware na biso bayebi naino te.—Nz. 77:11-13; Yis. 43:10-12; Mat. 13:52.
3. Ntango nini tokoki komanyola?
3 Komanyola ntango nini? Kaka ndenge Yesu asalaki, bandeko mosusu balamukaka ntɔngɔntɔngɔ ntango makɛlɛlɛ ezali naino te. Bamosusu bamonaka malamu komanyola na mpokwa liboso ya kolala. (Eb. 24:63) Ata soki tozali na makambo mingi ya kosala, tosengeli kozwa ntango mpo na komanyola. Bandeko mosusu bamanyolaka ntango bamati na bisi to taksi. Bamosusu balingaka komanyola na ntango ya bopemi ya midi mpo bátungisa bango te. Mingi mpe bamonaka ete komanyola liboso ya kobima na mosala ya kosakola, ata mpo na mwa ntango moke, esalisaka bango básakola na molende mingi mpe na mpiko.
4. Mpo na nini tosengeli komanyola?
4 Komanyola ekolisaka mposa na biso ya kosalela Yehova, esalisaka biso tótalela losambo na biso lokola likambo oyo eleki ntina na bomoi na biso, mpe ekómisaka makasi ekateli na biso ya kokoba kosakola. Yesu, oyo azali Mosakoli ya libosoliboso ya Nzambe, azwaki matomba na komanyola; biso mpe tokozwa matomba.