Salisá bana na yo bákóma basakoli
1. Nzembo 148:12, 13 esɛngi baboti bakristo básala nini?
1 Yehova asɛngaka bilenge bákumisa ye. (Nz. 148:12, 13) Yango wana, baboti bakristo basukaka kaka te na koteya bana na bango mateya ya Biblia mpe mibeko ya Nzambe. Bapesaka bango mpe formasyo mpo bákóma basakoli ya nsango malamu. Ndenge nini bakoki kosala yango malembemalembe?
2. Ndenge nini ndakisa malamu ya moboti ekoki kosalisa bana na ye?
2 Ndakisa malamu: Mosambisi Gideone ayebisaki bato na ye 300 boye: “Bokotala ndenge nakosala, bino mpe bokosala ndenge wana.” (Bas. 7:17) Bana batalaka ndenge baboti na bango basalaka mpe bamekolaka bango. Tata moko asalaka mosala na butu, kasi ntango azongaka ndako mokolo ya pɔsɔ na ntɔngɔ, na esika alala, abimaka na bana na ye na mosala ya kosakola ata soki alɛmbi mingi. Ata soki alobi eloko te, ndakisa na ye eteyaka bango ete mosala ya kosakola esengeli kozala na esika ya liboso. (Mat. 6:33) Bana na yo bamonaka yo ozali komipesa na esengo na makambo ya losambo, na ndakisa kobondela, kotánga Biblia, kopesa biyano na makita, mpe kosakola? Toboyi te, okoki te kozala ndakisa na makambo nyonso. Kasi, soki bana bazali komona milende na yo na mosala ya Yehova, bakokakatana te koyokela yo ntango ozali kosala makasi mpo na koteya bango básambela Yehova.—Mib. 6:6, 7; Rom. 2:21, 22.
3. Mikano nini ya kokokisa malembemalembe baboti bakoki kosalisa bana na bango bámityela mpe bákokisa yango?
3 Mikano oyo bakokokisa malembemalembe: Baboti balɛmbaka te kolakisa bana na bango kotambola, koloba, kolata bango moko, mpe bongo na bongo. Ntango bana bakoli, mikano kilikili etyamaka liboso na bango. Soki baboti bazali bakristo, basalisaka bana na bango bámityela mpe bákokisa mikano ya elimo oyo eyokani na mbula na bango mpe mayele na bango. (1 Ko. 9:26) Oteyaka bana na yo báyeba kopesa biyano na makita na maloba na bango moko mpe bábongisaka bango moko masolo oyo bakosala na Eteyelo ya mosala ya Teokrasi? (Nz. 35:18) Oteyaka bango báyeba kopesa litatoli na mabaku ndenge na ndenge? Osalisaka bango bámityela mokano ya kozwa batisimo mpe ya kokɔta na mosala ya ntango nyonso? Osalisaka bango bákutanaka mingi na basakoli ya molende mpe ya esengo, oyo bakoki kolendisa bango?—Mas. 13:20.
4. Matomba nini bana bakozwa soki baboti na bango babandaki koteya bango kosakola ntango bazalaki naino mike mpenza?
4 Mokomi ya Nzembo alobaki boye: “Ee Nzambe, oteyi ngai banda na bolenge na ngai, mpe kino sikoyo nazali kaka koyebisa misala na yo ya kokamwa.” (Nz. 71:17) Bandá koteya bana na yo ntango bazali naino mike mpo bákóma basakoli ya nsango malamu. Formasyo ya elimo oyo okopesa bango ekosalisa bango mingi ata ntango bakokóma mikóló!—Mas. 22:6.