Teyá bana na yo básanzola Yehova
1. Bana mike bakoki kosanzola Yehova?
1 Nzembo 148:12, 13 elendisi bilenge mibali mpe basi “básanzola nkombo ya [Yehova].” Makomami ezali na bandakisa mingi ya bana mike oyo basalaki bongo. Na ndakisa, “Samwele asalelaki [Yehova] naino ezalaki ye mwana.” (1 Sam. 2:18) Ezali “mwana mwasi [ya] moke” nde ayebisaki mwasi ya Namana ete mosakoli ya Yehova oyo azalaki na Yisalaele akokaki kobikisa Namana na maladi na ye ya maba. (2 Mik. 5:1-3) Ntango Yesu akɔtaki na tempelo mpe asalaki misala ya nguya, ezali “bana mibali” nde bagangaki ete: “Bikisá, tobondeli yo, Mwana ya Davidi!” (Mat. 21:15) Ndenge nini baboti bakoki koteya bana na bango básanzola Yehova?
2. Mpo na nini baboti basengeli kopesa bana na bango ndakisa ya malamu?
2 Pesá ndakisa: Yehova apesaki batata ya Yisalaele malako ete liboso ya kokɔtisa solo na mitema ya bana na bango, bango moko basengelaki liboso kolinga Yehova mpe kozala na mibeko na ye na mitema na bango. (Det. 6:5-9) Soki olobaka malamu mpo na mosala ya kosakola mpe osakolaka pɔsɔ nyonso, bana na yo bakomona ete mosala yango ezali na ntina mingi mpe bakosepela na yango.
3. Ndenge nini ndakisa ya baboti esalisaki ndeko mwasi moko?
3 Ndeko mwasi moko alobi na esengo nyonso boye: “Ntango nazalaki kokola, libota na biso mobimba tozalaki na momeseno ya kobima mosala ya kosakola mikolo nyonso ya pɔsɔ mpe ya lomingo. Yango esalisaki ngai namona ete baboti na ngai balingaka mpenza mosala yango. Tii ntango tokolaki, tozalaki kaka kosepela na mosala ya kosakola.” Ndeko mwasi yango akómaki mosakoli oyo azwi naino batisimo te ntango azalaki na mbula nsambo mpe sikoyo asali mbula 33 na mosala ya ntango nyonso.
4. Koteya bana mokemoke elimboli nini?
4 Teyáká bango mokemoke: Pesáká bana na yo libaku ya kosala ata likambo moko ntango obimi na bango na mosala ya kosakola. Na ndakisa, bakoki kofina butɔ ya ngonga ya lopango, kopesa moto trakte, to kotánga vɛrsɛ. Yango ekosalisa bango básepela lisusu mingi mpe bábanga te koyebisa bato nsango ya Bokonzi. Wana bazali kokola, basengeli komipesa lisusu mingi na mosala ya kosakola. Na bongo, salisá bango bákoba kokola na elimo mpe bámityela mikano ya elimo.
5. Nini esɛngisami mpo mwana akóma mosakoli oyo azwi naino batisimo te?
5 Soki omoni ete mwana na yo akokisi masɛngami mpo na kokóma mosakoli oyo azwi naino batisimo te mpe ye moko amonisi mposa yango, kozela te mpo na koyebisa bankulutu likambo yango. Soki mwana na yo akómi mosakoli, yango ekosalisa ye amona ete akómi ye moko na mokumba ya kosanzola Yehova. Yebá ete esɛngisami na mwana te ete ayeba makambo mingi lokola mokóló oyo azwá batisimo, liboso azwa batisimo. Mwana na yo ayebi mateya ya moboko ya Biblia? Atosaka mitinda ya Biblia ya bizaleli malamu? Alingi mpenza kobanda kosakola mpe kokóma Motatoli ya Yehova? Soki ezali bongo, bankulutu bakoki komona ete akokisi masɛngami mpo na kokóma mosakoli oyo azwi naino batisimo te.—Talá buku Tobongisami mpo na kosala mokano ya Yehova, nk. 79-82.
6. Mpo na nini ezali na ntina baboti básalisa bana na bango bákola na elimo?
6 Esɛngaka kosala milende mpo na kosalisa bana básanzola Yehova. Nzokande, ezali na eloko moko te oyo esepelisaka baboti mingi koleka komona bana na bango bazali kokola na elimo. Oyo eleki ntina, Yehova asepelaka ntango bana bayebisaka bato mosusu misala na ye ya kokamwa.