Makambo misato mpo obongisa lisusu lolenge na yo ya koteya
1. Mpo na nini tosengeli koluka kobongisa lisusu lolenge na biso ya koteya?
1 Basakoli nyonso ya nsango malamu bazali bateyi. Ezala tokutani na moto mpo na mbala ya liboso, tozongeli moto oyo asepelaki to tozali koyekola na moto Biblia, toteyaka. Mpe makambo oyo toteyaka ezali na ntina mingi. Tozali kosalisa bato bákanga ntina ya “makomi mosantu,” oyo ekoki kopesa bango “bwanya mpo na lobiko.” (2 Tim. 3:15) Ezali mpenza lokumu monene! Tólobela sikoyo makambo misato oyo ekosalisa biso tóbongisa lisusu lolenge na biso ya koteya.
2. Ndenge nini tokoki koteya na elobeli ya pɛtɛɛ?
2 Zaláká na elobeli ya pɛtɛɛ: Ntango toyebi likambo moko malamu, tokoki kokanisa ete likambo yango ezali mpe pɛtɛɛ epai ya moto oyo ayebi yango te. Yango wana, ntango ozali koyekola na moto Biblia, kobakisa makambo ebeleebele te oyo ezali na ntina mpenza te. Lobelá mpenza nde makambo ya ntina. Koteya malamu esɛngaka ntango nyonso te koloba mingi. (Mas. 10:19) Mbala mingi, ezalaka malamu koleka tótánga kaka bavɛrsɛ oyo esimbi lisolo. Nsima ya kotánga vɛrsɛ moko, bendá likebi na eteni na yango oyo eyokani na lisolo na bino. Lisolo Likoló ya Ngomba oyo ezali na Matai mokapo 5 tii 7 ezali na mateya ya mozindo ya Biblia, kasi Yesu ateyaki yango na elobeli ya pɛtɛɛ mpe na maloba moke.
3. Bandakisa ezali na ntina nini, mpe bandakisa ya ndenge nini ezalaka malamu koleka?
3 Saleláká bandakisa: Bandakisa etindaka bato bákanisa, esimbaka mayoki na bango mpe esalisaka bango bámikundola. Kokanisa te ete osengeli kozala mobɛti-masolo mpo oyeba kopesa bandakisa ya malamu. Mbala mingi, Yesu azalaki kosalela bandakisa ya mikuse mpe ya mindɔndɔmindɔndɔ te. (Mat. 7:3-5; 18:2-4) Kosala mwa mayemi na papye ekoki mpe kosalisa mingi. Soki omibongisi malamu, okozwa bandakisa oyo ebongi mpenza.
4. Ndenge nini tokoki kosalela mituna na ndenge ebongi mpenza?
4 Saleláká mituna: Mituna etindaka moyekoli akanisa. Yango wana nsima ya kotuna motuna, tikelá moyekoli mwa ntango. Soki yo moko opesi eyano nokinoki, okoyeba te soki moyekoli akangi ntina. Soki apesi eyano ya mabe, ekozala malamu otuna ye mwa mituna mosusu mpo ye moko abimisa eyano ya malamu na esika osuka kaka na kosembola ye. (Mat. 17:24-27) Ya solo, moko te kati na biso azali moteyi ya kokoka. Yango wana Biblia elendisi biso ete tókebaka na mateya na biso. Soki tosali bongo, biso moko tokozwa mapamboli ya seko mpe baoyo bazali koyoka biso.—1 Tim. 4:16.