Site Internet na biso ebongisami mpo na litomba na biso moko mpe bato mosusu

Yesu apesaki biso etinda tósakola nsango malamu ya Bokonzi “na mabele mobimba esika bato bafandi mpo ezala litatoli na bikólo nyonso.” (Mat. 24:14) Mpo na kokokisa ‘malamumalamu mosala na biso,’ basangisi ba-site Internet: watchtower.org, jw-media.org, mpe jw.org mpe ekómi jw.org.​—2 Tim. 4:5.

“Mabele mobimba esika bato bafandi”: Na mokili mobimba, moto moko na kati ya bato misato asalelaka Internet. Internet ekómi nzela ya libosoliboso ya koyeba makambo, mingimingi mpo na bilenge. Baoyo basalelaka Internet bazwaka biyano ya solosolo na mituna ya Biblia soki bakɔti na site na biso. Ezali kosalisa bango báyeba ebongiseli ya Yehova mpe ekómi pɛtɛɛ mpo na bango kosɛnga boyekoli ya Biblia ofele. Internet esali ete nsango malamu ekɔta na bisika oyo bato bazalaki na mabaku mingi te ya koyoka nsango ya Bokonzi.

“Bikólo nyonso”: Mpo na kopesa litatoli na “bikólo nyonso,” tosengeli koteya mateya ya Biblia na minɔkɔ ndenge na ndenge. Bato oyo bakɔtaka na site jw.org bakoki kotánga makambo na minɔkɔ soki 400, koleka ba-site mosusu nyonso.

Salelá yango malamu: Site ya sika jw.org esalemi kaka te mpo na kopesa litatoli epai ya bato oyo bazali Batatoli te. Ebongisami mpe mpo biso Batatoli tósalela yango. Soki osalelaka Internet, tolendisi yo oluka komesana na site jw.org. Makanisi oyo elandi emonisi ndenge ya kosalela yango.

[Etanda na lokasa 3]

(Mpo na komona yango, talá mokanda)

Meká kosalela yango

1 Komá www.jw.org na esika bakɔtisaka adrɛsi ya site Internet na ordinatɛrɛ na yo.

2 Mpo na koyeba makambo oyo ezali na kati, finá na bisika lokola: mitó ya makambo, makambo ezali na kati, mpe bisika mosusu oyo okoki kokɔta.

3 Meká kosalela jw.org na ndakisa, na telefone oyo ekoki kokɔtisa yo na Internet. Makomi ekozala mike, kasi makambo nyonso ekozala ndenge moko.