Ndenge ya kosalela mwa buku ya sika Nsango malamu oyo euti na Nzambe!

Oyo ebimisamaki mpo na kosalisa biso tózongela bato mpe tóbanda koyekola na bango Biblia

1. Mwa buku nini ya sika tozwaki na liyangani ya etúká “Bátela motema na yo!” mpo esalisa biso na kozongela bato mpe kobanda koyekola na bango Biblia?

¹ Na liyangani ya etúká “Bátela motema na yo!” tosepelaki kozwa mwa buku ya sika oyo ekosalisa biso na kozongela bato mpe koyekola na bango Biblia. Nsango malamu oyo euti na Nzambe! ezwi esika ya mbwa buku Nzambe azali kosɛnga mpe mateya na yango ezali mikuse. Yango wana, tokosalela yango mpo na koyekola na bato ata liboso ya porte. Mwa buku Nzambe azali kosɛnga ezalaki kolobela masɛngami mpo na bakristo, oyo ekoki kozala mpasi mpo moto oyo abandi koyekola sika andima yango. Nzokande, mwa buku oyo ya sika elobeli mingi nsango malamu oyo ezali na Biblia.—Mis. 15:35.

2. Mpo na nini mwa buku Nsango malamu ebimisamaki?

² Mpo na nini ebimisamaki? Bandeko na mokili mobimba bazalaki na mposa ya esaleli moko ya pɛtɛɛ oyo ekobenda bato na solo mpe ekomema bango báyekola buku Biblia eteyaka, buku na biso ya libosoliboso mpo na koyekola na bato. Mbala mingi, bato oyo babangaka koyekola buku bandimaka koyekola Biblia na nzela ya mwa buku. Longola yango, ezalaka mpasi te kobongola mwa buku na minɔkɔ ebele.

3. Nini ekesenisi mwa buku yango na babuku mosusu oyo toyekolaka na bato?

³ Ndenge ebongisami: Mikanda na biso mingi oyo tosalelaka mpo na koyekola, ebongisami na ndenge oyo moto akoki kotánga mpe kokanga ntina, ata soki basalisi ye te. Kasi ezali bongo te mpo na mwa buku oyo. Ndenge oyo bakomi yango, esengeli moteyi asalisa moyekoli ya Biblia mpo akanga ntina na yango. Na yango, ntango tozali kopesa moto mwa buku yango, ekozala malamu koleka tótalela elongo na ye paragrafe moko to mibale. Lokola baparagrafe ezali mikuse, tokoki kotalela yango elongo na moto, ata liboso ya porte to na esika na ye ya mosala. Atako ezali malamu kobanda na liteya 1, tokoki mpe kobanda koyekola na liteya mosusu nyonso.

4. Ndenge nini mwa buku yango ezali kosalisa biso tóteya mbala moko na Biblia?

⁴ Na mikanda na biso mingi, biyano ya mituna oyo ekomami ezwamaka na kati ya paragrafe. Kasi, na mwa buku oyo, biyano ezwami mingimingi na kati ya Biblia. Bato mingi basepelaka koyeba makambo mbala moko na Biblia, na esika ya babuku na biso. Yango wana, maloba ya bavɛrsɛ mingi oyo etyami wana ezali na paragrafe te. Esengeli kotánga bavɛrsɛ yango na kati ya Biblia. Yango ekosalisa bango bámona ete makambo bazali koyekola euti epai ya Nzambe.—Yis. 54:13.

5. Mpo na nini ezali na ntina moteyi amibongisaka malamu mbala nyonso liboso ya koyekola na moto?

⁵ Mwa buku yango elimboli bavɛrsɛ nyonso te. Mpo na nini? Ebongisami mpo na kolendisa moyekoli atuna mituna mpe kosalisa moteyi asalela makoki na ye ya koteya. Na yango, esengeli tómibongisaka malamu mbala nyonso liboso ya koyekola na moto. Likebisi: Kolobaka mingi te. Tosepelaka kolimbola Makomami. Kasi, soki tozali kosɛnga moyekoli alimbola vɛrsɛ, tokosalisa ye mpenza akanga ntina. Soki tozali kotuna mwa mituna na mayele, tokosalisa ye abimisa makanisi ya ntina ya vɛrsɛ mokomoko.—Mis. 17:2.

6. Ndenge nini tokoki kosalela mwa buku yango: (a) na bisika oyo bato bandimaka Nzambe mpe Biblia te? (b) ntango tokei ndako na ndako? (c) ntango tozali kosɛnga bato mbala moko ete tóbanda koyekola na bango Biblia? (d) ntango tozali kozongela bato?

⁶ Tokoki kokabola mwa buku oyo ntango nyonso, kaka ndenge tosalaka mpo na mikanda mosusu oyo toyekolaka yango na bato, ata soki ezali te na kati ya mikanda oyo tozali kokabola na sanza. Basakoli mingi bakosepela kosalela yango mpo na kobanda koyekola na bato ata na porte. Lisusu, ndenge elobamaki na liyangani ya etúká, kosalela mwa buku yango ntango ozali kozongela bato oyo basepelaki “ekoki mpenza kosalisa yo osepela kozongela bato!”—Talá bitanda na nkasa 5-7.

7. Ndenge nini tokoki kotambwisa boyekoli ya Biblia na mwa buku yango?

⁷ Ndenge ya kotambwisa boyekoli: Tokoki kobanda boyekoli na kotánga motuna mokomoko oyo ekomami na makomi ya moindo makasi. Na nsima, kotánga paragrafe mpe vɛrsɛ (to bavɛrsɛ) oyo ekomami na makomi etɛngami mwa moke. Salelá mwa mituna na mayele mpo na kosalisa moto akanga ntina ya bavɛrsɛ. Mpe liboso ya koleka na eteni elandi, sɛngá moto yango ayanola na mituna oyo ekomami na makomi ya moindo makasi, mpo omona soki akangi ntina. Wana tozali kozongela ye na ebandeli, ekozala malamu tótalelaka kaka moko ya mituna oyo ekomami na makomi ya moindo makasi. Na nsima, tokoki kobenda lisolo mwa molai mpo tótalela liteya mobimba.

8. Tosengeli koloba nini liboso ya kotánga bavɛrsɛ, mpe mpo na nini?

⁸ Bavɛrsɛ oyo liboso na yango bakomi “tángá” epesi mbala moko eyano na motuna oyo ekomami na makomi ya moindo makasi. Liboso ya kotánga vɛrsɛ moko, kolobaka te ete: “Ntoma Paulo akomaki” to, “Talá oyo Yirimia asakolaki.” Moto yango akoki kokanisa ete tozali kotánga kaka maloba ya bato. Ekozala malamu koleka tólobaka nde: “Liloba ya Nzambe elobi” to, “Talá oyo Biblia esakolaki.”

9. Tosengeli nde kotánga bavɛrsɛ nyonso oyo ezali na paragrafe ntango tozali koyekola?

⁹ Tosengeli nde kotánga bavɛrsɛ nyonso oyo ezali na paragrafe to kaka oyo bakomi “tángá”? Yango ekotalela ndenge makambo ezali. Vɛrsɛ nyonso oyo ezali na paragrafe ezali na likanisi ya ntina na likambo oyo tozali kolobela. Kasi ntango mosusu, soki moyekoli azali na ntango mingi te, asepeli mpenza te, to ayebi kotánga malamu te, tokoki kotánga kaka bavɛrsɛ oyo bakomi “tángá.”

10. Ntango nini tokoki kokɔta na boyekoli na buku Biblia eteyaka?

¹⁰ Ntango nini kokɔta na buku Biblia eteyaka: Nsima ya kosolola na moto mbala mingi mpe kobanda koyekola na ye Biblia, tokoki kokɔta na buku Biblia eteyaka to kokoba na mwa buku Nsango malamu tii na nsuka. Tosengeli kosalela bososoli mpo na koyeba ntango nini tokoki kokɔta na buku. Soki tokɔti na buku Biblia eteyaka, tosengeli nde kobanda kaka na ebandeli? Mobeko ezali te mpo na yango. Bato nyonso bazalaka ndenge moko te. Atako bongo, bayekoli mingi bakoyeba makambo mingi soki bayekoli lisusu na bozindo na buku Biblia eteyaka, mateya oyo bayekolaki na mwa buku.

11. Mpo na nini tosengeli kosalela malamu mwa buku wana ya sika?

¹¹ Na mokili oyo bansango ya malamu ezalaka mingi te, ezali lokumu mpo na biso koyebisa nsango oyo eleki malamu: Bokonzi ya Nzambe ezali koyangela mpe mosika te, ekomema bato na mokili ya sika epai boyengebene ekozala! (Mat. 24:14; 2 Pe. 3:13) Tozali na elikya ete bato mingi oyo bazali koyoka nsango yango bakondima maloba oyo ekomamaki na litambwisi ya elimo santu ete: “Makolo ya moto oyo auti na bangomba azali koya na nsango malamu, ya moto oyo azali kosakola kimya, ya moto oyo azali koya na nsango malamu ya eloko moko ya malamu koleka, ya moto oyo azali kosakola lobiko, ya moto oyo azali koloba na Siona ete: ‘Nzambe na yo akómi mokonzi,’ ezali kitoko mingi mpenza!” (Yis. 52:7) Tiká tósalela mwa buku wana ya sika mpo na kosakola nsango malamu euti na Nzambe epai ya bato oyo bazali na mposa ya mai ya bomoi na teritware na biso!

Ntango tokei kosakola ndako na ndako:

“Nayei kotala yo mpo nalakisa yo ndenge ezali pɛtɛɛ koyeba oyo Nzambe akani mpo na bato na mikolo ezali koya. Osilá komituna soki Nzambe akolongola makambo oyo enyokolaka biso? [Tiká ye apesa eyano.] Mwa buku oyo emonisi esika okoki kozwa eyano ya motuna yango na Biblia. [Pesá ye mwa buku, mpe bótánga paragrafe ya liboso na liteya 1 mpe Yirimia 29:11.] Ndenge totángi awa, omoni te ete Nzambe alingi biso tózala na bomoi ya malamu na mikolo ezali koya? [Tiká ye apesa eyano.] Soki olingi, okoki kotikala na mwa buku yango. Na mbala ekoya, tokotalela paragrafe ya mibale mpo tózwa eyano ya Biblia na motuna oyo: ‘Ndenge nini Nzambe akolongola makambo oyo enyokolaka bato?’” Soki omoni ete moto yango azali na mwa miniti na mbala ya liboso oyo okutani na ye, okoki kotánga mpe kolobela paragrafe ya mibale mpe bavɛrsɛ misato oyo ezali wana. Bóyokana mpo ozongela ye mpo bótalela motuna 2 na liteya yango.
“Bato mingi basepelaka kobondela, mingimingi ntango bazali na mikakatano. Yo mpe obondelaka na bantango mosusu? [Tiká ye apesa eyano.] Okanisi ete Nzambe ayokaka mabondeli nyonso, to ekoki kozala ete mabondeli mosusu esepelisaka ye te? [Tiká ye apesa eyano.] Nazali na mwa buku moko awa oyo elakisi ndenge ya kozwa biyano oyo Biblia epesi na mituna yango. [Pesá ye mwa buku yango, mpe bótalela paragrafe ya liboso na liteya 12 mpe bótánga bavɛrsɛ oyo bakomi “tángá.”] Omoni te ete ezali likambo ya esengo mpenza ete Nzambe andima koyoka biso? Kasi mpo Nzambe andima mpenza libondeli na biso, tosengeli koyeba ye malamu. [Kende na liteya 2 mpe lobelá mitó ya makambo moke.] Soki osepeli, nakoki kotikela yo mwa buku yango, mpe mbala ya nsima, tokoki kotánga biyano oyo Biblia epesi na mituna wana ya ntina.”
“Nayei kotala yo mpo bato mingi bazali komituna soki tokosuka wapi na mokili oyo. Okanisi ete ata ndɛlɛ makambo ekobonga? [Tiká ye apesa eyano.] Bato mingi bakamwaka na koyeba ete Biblia ezali na nsango malamu oyo ekoki kopesa biso elikya. Talá mituna mosusu oyo Biblia epesi biyano na yango.” Pesá ye mwa buku, mpe sɛngá ye apona motuna oyo esepelisi ye mingi na mituna oyo ezali na lokasa ya nsuka. Na nsima, bókende na liteya oyo aponi, mpe lakisá ye ndenge toyekolaka na bato. Bóyokana mpo ozongela ye mpo bótalela motuna oyo elandi, na liteya yango.

Bandá mbala moko koyekola na moto:

● “Nayei mpo na mwa miniti moke, kolakisa yo lolenge ya sika ya koyekola Biblia. Mwa buku oyo ezali na mateya 15, oyo emonisi bisika oyo okoki kozwa biyano na mituna ya ntina mingi na kati ya Biblia. [Lakisá ye lokasa ya liboso mpe ya nsuka.] Osilá komeka koluka koyeba makambo oyo ezali na Biblia? [Tiká ye apesa eyano.] Tiká nalakisa yo mateya oyo ezali na kati mpe okomona ete ezali mpenza pɛtɛɛ. [Bótalela paragrafe ya liboso ya motuna 3 na liteya 3, mpe bótánga Emoniseli 21:4, 5. Soki likoki ezali, bótalela mpe paragrafe oyo elandi mpe bavɛrsɛ oyo bakomi “tángá.”] Soki osepeli, nakoki kotikela yo mwa buku yango. Tosɛngi yo omeka koyekola Biblia ata mbala moko. Soki osepeli na boyekoli yango, okoki kokoba. Na mbala ya nsima, tokotalela liteya 1. Yebá ete liteya mokomoko ezwi kaka lokasa moko.”

Lakisá yango ntango ozongeli moto:

● Ntango tozongeli moto oyo asepelaki, tokoki koloba boye: “Nasepeli komona yo lisusu. Namemeli yo mwa buku oyo mpo ezali kopesa biyano euti na Biblia na mituna mingi ya ntina. [Pesá ye mwa buku, mpe sɛngá ye atala lokasa ya nsuka.] Na masolo oyo, lisolo nini esepelisi yo mingi? [Tiká ye apesa eyano. Na nsima, kende na lisolo oyo aponi.] Tiká nalakisa yo ndenge okoki kosalela mwa buku oyo mpo ozwa eyano oyo Biblia epesi na motuna yango.” Bólobela paragrafe moko to mibale mpo na kolakisa ye ndenge boyekoli esalemaka mpe bótanga bavɛrsɛ oyo bakomi “tángá.” Soki osali bongo, osili kobanda koyekola na moto Biblia! Tikelá ye mwa buku yango, mpe bóyokana mpo ozongela ye. Soki bosilisi liteya moko, okoki kotalela liteya mosusu oyo akopona to kobanda na liteya ya ebandeli ya mwa buku yango.