Makambo oyo bandeko bakutanaki na yango

◼ Australie: John, mobali moko oyo atángá kelasi mingi, azalaki kokende losambo na bolenge na ye, kasi akómaki kondima ata moke te ete Nzambe azali. Mobongisi-nzela moko atikelaki ye mwa buku La vie a-t-elle été créée ? mpe ntango azongelaki ye atikelaki ye mwa buku L’origine de la vie. Mobongisi-nzela yango akobaki kosolola na John mpo asepela lisusu mingi na mateya ya solo; azalaki koyela ye bazulunalo ya sika mpe kolakisa ye masolo nyonso oyo elobeli bozalisi mpe bisakweli ya Biblia. Ntango amonaki ete ebongi, apesaki John buku La Bible : Parole de Dieu ou des hommes ? Nsima ya kotánga yango, John abandaki koloba ete ezali mwa mpasi koyeba soki Nzambe azali to te. Na yango, mobongisi-nzela asalelaki buku Biblia eteyaka, alakisaki ye paragrafe 8 na lokasa 20 mpe paragrafe 13-16 na nkasa 23-24. Bavɛrsɛ oyo ezali wana ekamwisaki John mingi yango wana alobaki boye: “Ntango mosusu, esengeli natyela lisusu Biblia likebi.”

◼ Mexique: Mobali moko ayebisaki mosakoli moko ete andimaka te ete Biblia ekomamaki na litambwisi ya elimo ya Nzambe. Mosakoli asɛngaki alakisa mobali yango makambo oyo emonisi ete Biblia ekomamaki na litambwisi ya elimo ya Nzambe. Nsima ya kosolola na ye mwa mbala mingi, motema ya mobali yango ebandaki kosimbama na makambo oyo azalaki koyekola na Biblia. Asepelaki mingi mpenza ntango ayekolaki mitinda ya Nzambe. Mobali yango ayebisaki mosakoli boye: “Na ebandeli ntango tozalaki kotánga Biblia, nazalaki komona makambo yango kaka lokola ya babuku mosusu nyonso mpe ezalaki kosimba motema na ngai te. Kasi sikoyo, mingimingi toli na yango mpo na bizaleli malamu, ezali kotungisa lisosoli na ngai.”

◼ États-Unis: Ntango Motatoli moko ná mwasi na ye bazalaki kosalela lolenge ya sika ya kopesa litatoli na engumba moko monene, bakutanaki na mwasi moko ya ekoló Taïwan oyo andimelaka Nzambe kasi azalaki kokanisa ete Biblia ezali buku ya bato ya Mpoto mpe ya Amerika. Mwasi yango ayaki esika batandaki mikanda mpamba te, atako azalaki na bozwi, azalaki komona ete azangi makambo mingi. Atyaki motema ete Biblia ekosalisa ye akóma na bomoi oyo ezali na ntina. Motatoli yango ná mwasi na ye babandaki koyekola na ye Biblia na buku Biblia eteyaka mpe mwa buku La paix et le bonheur durables : comment les trouver. Na esika ya koyekola mokapo 2 ya buku, bayekolaki eteni oyo elobi “Un guide bénéfique pour tous les humains” ya mwa buku yango. Nsima ya kotalela baparagrafe motoba ya ebandeli na eteni yango, mwasi yango akamwaki mpe amonisaki ete Biblia ekeseni mpenza na babuku mosusu nyonso ya lingomba. Nsima ya kotalela bisakweli ya Biblia oyo ekokisamaki, alobaki boye: “Namoni ezali na buku mosusu te oyo ezali na bosikisiki lokola Biblia!”

◼ Japon: Mobali moko ayebisaki mosakoli moko ete andimelaka Nzambe te, kasi mosakoli yango akobaki kokende kotala ye mpo na mwa miniti mpe kolakisa ye masolo ya Lamuká! oyo elobi “Ebimá kaka yango moko?” Mokemoke, mobali yango abongolaki makanisi mpe abandaki kondima ete ntango mosusu Mozalisi azali. Sikoyo, akómi kondima ete Nzambe azali mpe mosakoli azali koyekola na ye na mwa buku Nsango malamu oyo euti na Nzambe!

◼ Canada: Mwasi moko azalaki kobima na ndako mpo amata na motuka na ye, mpe ndeko mwasi moko apesaki ye zulunalo ya sika. Ntango ndeko mwasi azongelaki ye, mwasi yango ayebisaki ye polele ete asepeli na makambo yango te mpo andimelaka Nzambe te. Ndeko mwasi azwaki ekateli ya kotika te mpe amemelaki ye mwa buku Une vie pleinement satisfaisante : comment ? Ntango ndeko mwasi akutaki mwasi yango na ndako, ayebisaki ye ete atako ayebi ete andimelaka Nzambe te, azalaki kokanisa ye mpo ayebi ete abɔkɔlaka bana ye moko. Ndeko mwasi alakisaki ye paragrafe 6 na lokasa 4 ya mwa buku yango, oyo emonisi ete batoli ya bato ezali kolonga te. Na nsima, alendisaki mwasi yango atánga makanisi oyo ezali na liteya 2 na oyo etali kobɔkɔla bana. Mwasi yango asepelaki mpenza kozwa mwa buku yango.