Batrakte ya sika ebongisami na ndenge oyo ezali kobenda likebi ya bato!
1. Bisaleli nini ya sika mpo na mosala ya kosakola ebongisami na ndenge oyo ezali kobenda likebi ya bato?
1 Na liyangani ya etúká ya mobu 2013, oyo ezalaki na motó ya likambo “Liloba ya Nzambe ezali solo!” batrakte mitano ya sika ebimisamaki! Longola yango, Nsango ya Bokonzi No. 38, oyo ezalaki na motó ya likambo “Bakufi bakozonga mpenza na bomoi?” ekɔti mpe na molɔngɔ ya batrakte. Batrakte yango nyonso motoba ebongisami na ndenge oyo ezali kobenda likebi ya bato. Mpo na nini batrakte yango ebongisami na lolenge wana ya sika? Wapi lolenge ya malamu ya kosalela batrakte yango ntango tozali kokabola yango ndako na ndako?
2. Mpo na nini batrakte ya sika ebongisami na lolenge wana?
2 Ntina oyo ebongisami ndenge wana: Mpo na kobanda lisolo na ndenge ebongi na mosala ya ndako na ndako, esɛngaka makambo minei oyo: (1) Kotuna moto motuna oyo ekotinda ye apesa likanisi na ye mpo na kobanda lisolo. (2) Kolobela likanisi moko oyo euti na Biblia. (3) Kotikela moto mokanda mpo atánga. (4) Kotikela moto motuna oyo bokolobela mbala ya nsima, mpe koyokana na ye mpo ozongela ye. Ndenge oyo batrakte ya sika ebongisami, ezali kosalisa biso tósala makambo wana minei kozanga mindɔndɔ.
3. Ndenge nini tokoki kopesa moto trakte moko ya sika na mosala ya kosakola?
3 Ndenge ya kosalela yango: (1) Nsima ya kopesa moto mbote, lakisá ye motuna oyo asengeli kopona eyano moko na biyano misato oyo ezali na lokasa ya liboso ya trakte, mpe sɛngá ye apesa likanisi na ye. (2) Fungolá trakte yango mpe bótalela esika bakomi “Biblia elobi ete.” Soki likoki ezali, tángá vɛrsɛ mbala moko na Biblia. Soki moto yango azali na ntango, bótalela esika bakomi “Bolamu nini okozwa?” (3) Pesá ye trakte yango mpe lendisá ye atánga makambo oyo etikali ntango akosepela. (4) Liboso ya kokabwana na ye, lakisá ye motuna oyo ezali na lokasa ya nsuka, na esika bakomi “Kanisá naino” mpe bóyokana mpo na kotalela eyano ya Biblia mbala ya nsima.
4. Ndenge nini tokoki kosalela batrakte ntango tozongeli moto?
4 Ezali mpe mpasi te kosalela trakte yango ntango tozongeli moto. Salelá kaka bavɛrsɛ oyo ezali na lokasa ya nsuka ya trakte yango mpo na kopesa eyano na motuna oyo otikelaki ye. Liboso okende, lobelá fɔtɔ ya mwa buku Nsango malamu oyo ezali wana, na nsima lakisá ye mwa buku yango mpe liteya oyo elobeli likambo oyo bosololi, mpe na nsuka pesá ye mwa buku yango. Soki andimi kozwa yango, yokaná na ye mpo na kotalela mwa buku yango mbala ya nsima. Soki osali bongo, obandi koyekola na moto Biblia! To mpe, na esika ya kopesa ye mwa buku, okoki kopesa ye trakte mosusu mpe koyokana na ye mpo na kotalela yango ntango okozongela ye.
5. Batrakte ezali na ntina nini na mosala na biso ya kosakola?
5 Esali sikoyo mbula koleka 130 banda tosalelaka batrakte na mosala na biso ya kosakola. Atako batrakte nyonso ezalaka monene to molai ndenge moko te, yango nyonso ezali mpenza bisaleli oyo ebimisá matomba na mosala ya kosakola. Tiká ete tósalela malamu batrakte ya sika mpo na kokoba kopalanganisa boyebi ya Biblia na mabele mobimba!—Mas. 15:7a.