Landá ndakisa ya basakoli—Sefania
1. Makambo ezalaki ndenge nini ntango Sefania azalaki mosakoli, mpe na ndenge nini azali ndakisa malamu mpo na biso lelo oyo?
1 Na katikati ya ekeke ya nsambo liboso ya ntango na biso, losambo ya Baala ezalaki kosalema polele na Yuda. Mokonzi mabe, Amone, autaki kobomama mpe elenge mokonzi Yosiya akómaki koyangela. (2 Nt. 33:21–34:1) Na ntango yango, Yehova atindaki Sefania ayebisa nsango ya lisambisi na ye. Atako Sefania akokaki kozala moko ya bato ya libota ya bokonzi ya Yuda, alɛmbisaki te nsango ya etumbu ya Yehova epai ya bakonzi ya Yuda. (Sef. 1:1; 3:1-4) Ndenge moko mpe, tosalaka makasi ya komekola mpiko ya Sefania mpe toboyaka ete bandeko ya libota na biso bápekisa biso kosambela Yehova. (Mat. 10:34-37) Nsango nini Sefania asakolaki, mpe ebimisaki matomba nini?
2. Tosengeli kosala nini mpo Yehova abatela biso na mokolo ya nkanda na ye?
2 Tóluka Yehova: Kaka Yehova nde akoki kobikisa bato na mokolo ya nkanda ye. Yango wana, Sefania alendisaki bato ya Yuda ete báluka Yehova, báluka boyengebene, mpe báluka komikitisa wana ntango ezalaki naino. (Sef. 2:2, 3) Ezali mpe bongo na mikolo na biso. Lokola Sefania, tozali kolendisa bato báluka Yehova, kasi biso moko mpe tosengeli kokanga mabɔkɔ te; tosengeli kozala na ekateli ya koboya ‘kozonga nsima mpe kotika te kolanda Yehova.’ (Sef. 1:6) Tolukaka nde Yehova malamumalamu na koyekola Liloba na ye mpe kobondela ye mpo na kosɛnga litambwisi na ye. Tolukaka boyengebene na ndenge tozalaka na bizaleli ya pɛto. Tolukaka komikitisa na ndenge totosaka mpe tolandaka litambwisi ya ebongiseli ya Yehova kozanga kokakatana.
3. Mpo na nini tosengeli kotalelaka mosala ya kosakola na ndenge oyo ebongi?
3 Matomba: Nsango ya lisambisi oyo Sefania asakolaki elendisaki bato mosusu na Yuda, kasi mingimingi Yosiya, oyo abandaki koluka Yehova ntango azalaki naino elenge. Na nsima, Yosiya asalaki mosala monene ya kosilisa losambo ya bikeko na ekólo. (2 Nt. 34:2-5) Lelo oyo, atako mboto mosusu ya Bokonzi ekweaka pembeni na nzela, na mabanga, to na kati ya nzubɛ, mosusu mpe ekweaka na mabele ya malamu mpe ebotaka mbuma. (Mat. 13:18-23) Tondimisami mpenza ete Yehova akokoba kopambola milende na biso wana tozali kosala mingi mpo na kopalanganisa mboto ya Bokonzi.—Nz. 126:6.
4. Mpo na nini tosengeli ‘kozela Yehova’?
4 Bato mosusu ya Yuda bakanisaki ete Yehova akosala eloko te. Kasi, Yehova amonisaki mpenza ete mokolo na ye monene ekómaki pene. (Sef. 1:12, 14) Kaka bato oyo bakimaki epai ya Yehova nde babikaki. (Sef. 3:12, 17) Wana tozali ‘kozela Yehova,’ tiká tókoba kosala na esengo mpe na bomoko elongo na bandeko na biso mpo na kosambela Nzambe na biso monene!—Sef. 3:8, 9.