Ndenge ya kosalela shario to mesa ya kotanda mikanda na mosala ya kosakola

Kopesa litatoli na kosalela shario to mesa ya kotanda mikanda ebimisaka matomba mpo ezali kosala ete bato ya mitema sembo báyeba solo. (Yoa. 6:44) Na yango, bankulutu balendisamaki ete bázwa bibongiseli ya kopesa litatoli na bisika ya bato nyonso, epai oyo bato mingi balekaka na makolo na teritware na bango. Lokola esɛngaka te ete shario to mesa ezala kaka esika moko, mbala mingi ekozala na ntina te ya kosɛnga ndingisa epai ya bakonzi. Banani bakoki kosalela shario to mesa mpo na kosakola? Basakoli oyo bazali na mayele ya kososola, baoyo balataka malamu mpe bayebi kosolola malamu na bato. Makambo oyo elandi ekosalisa basakoli báyeba oyo bakosala mpe oyo bakosala te mpo bákokisa malamu mosala yango.

Makambo ya kosala:

Zalá na boboto, yebá koyamba bato mpe kosalisa baleki-nzela. Basakoli mosusu bamungamungaka mpe bapesaka mbote na esengo. Soki moto atali mikanda oyo etandami na shario to mesa wana azali koleka, okoki koloba boye: “Okoki kozwa eloko soki osepeli.”
Tɛlɛmá mwa moke mosika ya shario to mesa. Na bisika mosusu basakoli bazwaka matomba mpo batɛlɛmaka mwa moke mosika. Bamosusu bamonaka ete kosala bongo esalaka ete baleki-nzela bákakatana kotɛlɛma, yango wana batɛlɛmaka mwa mosika koleka mpe bazelaka tii moto aya na shario to na mesa. Ntango moto apusani na shario to mesa, meká kosolola na ye, na ndakisa tuná ye boye: “Osilá kokanisa na motuna wana liboso?”
Salelá Biblia mbala mingi soki likoki ezali.
Limbolá ebongiseli ya koyekola na bato Biblia na moto nyonso oyo azwi moko ya mikanda oyo tosalelaka mpo na koyekola Biblia, lokola buku Biblia eteyaka. Sɛngá ete olakisa ye video Mpo na nini koyekola Biblia? na telefone to na tablɛti.
Soki likoki ezali, zwá adrɛsi, nimero ya telefone to adrɛsi e-mail ya bato oyo basepeli. Soki moto yango afandaka na teritware na bino te, tondisá formilɛrɛ Veuillez suivre l’intérêt (S-43), mpe pesá yango na sɛkrɛtɛrɛ kozanga koumela.