Ndenge ya kosimba motema ya bato oyo tozali koteya
1. Mateya ya Yesu esalaki nini na mitema ya bato oyo bazalaki koyoka ye?
1 Yesu Kristo asimbaki motema ya bato oyo bazalaki koyoka ye. Na libaku moko, mitema ya bayekoli na ye ezalaki “mɔtɔmɔtɔ” ntango alimbwelaki bango Makomami. (Luka 24:32) Lokola motema nde esengeli kotinda biso tótosa Nzambe, ndenge nini tokoki kosimba mayoki ya bato oyo tozali koteya mpo etinda bango bábongola makambo mosusu na bomoi na bango?—Rom. 6:17.
2. Ndenge nini mayele ná bososoli esalisaka biso tósimba motema ya moto?
2 Zalá na mayele mpe na bososoli: Mpo na bato mingi, koyebisa bango kaka oyo ezali malamu to mabe, ekotinda bango bábongwana te. Kutu, kosalela bavɛrsɛ ebeleebele ya Biblia oyo ezali kokweisa bindimeli na bango, ekoki kokimisa bango. Mpo na kolendisa moto, tosengeli liboso koyeba nini etindaka ye andima mpe asala makambo oyo asalaka. Kosalela na mayele mituna oyo ekotinda moto abimisa makanisi na ye, ekotinda ye aloba makambo oyo ezali na motema na ye. (Mas. 20:5) Na ntango yango nde tokopona na Liloba ya Nzambe makambo oyo ekosimba motema na ye. Na yango, tosengeli komonisa ete tozali kosepela na ye mpe kozala na motema molai. (Mas. 25:15) Yebá ete bato nyonso bakolaka ndenge moko te na elimo. Zelá ete elimo santu ya Yehova esalisa ye na makanisi mpe na makambo azali kosala.—Mrk. 4:26-29.
3. Ndenge nini tokoki kosalisa bato oyo toteyaka bákóma na bizaleli ya malamu?
3 Salisá bango bákóma na bizaleli ya malamu: Bavɛrsɛ ya Biblia oyo emonisaka polele bolamu mpe bolingo ya Yehova ekoki kosalisa bato oyo toteyaka bákóma na bizaleli ya malamu. Tokoki kosalela Nzembo 139:1-4 to Luka 12:6, 7 mpo na komonisa ndenge oyo Nzambe akipaka mokomoko na biso. Soki bato bazali mpenza na botɔndi mpo na boboto monene ya Yehova, bakokóma kolinga ye mingi mpe bakokangama na ye. (Rom. 5:6-8; 1 Yoa. 4:19) Lisusu, soki bayebi ete etamboli na bango ekoki kosepelisa Yehova to koyokisa ye mawa, ekotinda bango básala makambo oyo esepelisaka ye mpe bápesa ye lokumu.—Nz. 78:40, 41; Mas. 23:15.
4. Ntango tozali koteya bato na mosala ya kosakola, ndenge nini tokoki komonisa limemya na bonsomi na bango ya kopona?
4 Yehova atindaka moto moko te na makasi ete atosa ye. Kasi, amonisaka nde bato litomba oyo bakozwa soki balandi toli na ye. (Yis. 48:17, 18) Tokomonisa ete tozali komekola Yehova ntango tozali koteya na ndenge oyo ekosalisa bato bázwa bikateli bango moko. Ntango bato bandimisami ete basengeli kosala mbongwana na bomoi na bango, ebimisaka mpenza matomba oyo eumelaka. (Rom. 12:2) Esalisaka mpe bango bápusana mpenza penepene na Yehova, “moto oyo atalaka mitema malamumalamu.”—Mas. 17:3.