Ndenge ya kosalela mikanda oyo batángi kotánga
1. Longolá mikanda oyo ekomami, nini mosusu ekoki kosalisa biso?
1 Bato mingi basepelaka kotánga maloba ya kitoko mpe ya sikisiki ya solo oyo ezali na jw.org. (Mos. 12:10) Kasi, osilá kosalela mikanda oyo batángi kotánga? Yango esalisaka biso tóyoka makambo mingi oyo ezali na site Internet na biso. Ndenge nini tokoki kozwa litomba na mikanda oyo batángi kotánga?
2. Ndenge nini tokoki kosalela mikanda oyo batángi kotánga mpo na boyekoli na biso moko to ya libota?
2 Mpo na boyekoli na biso moko to ya libota: Koyoka botángi ya Biblia, ya bazulunalo, to ya mokanda mosusu ntango tozali kosala mobembo to kosala misala ya mokolo na mokolo ekoki kosalisa biso tósalela ntango na biso malamu mpenza. (Ef. 5:15, 16) Tokoki kosala ete losambo na biso na kati ya libota ezala ntango nyonso ndenge moko te soki tozali koyoka botángi ya mikanda mpe tozali kolanda na mokanda na biso. Koyoka mikanda oyo batángi kotánga na boyekoli na biso moko ekosalisa mpenza, mingimingi soki tolingi kokolisa makoki na biso ya kotánga to mpe tozali koyekola monɔkɔ moko boye.
3. Na teritware na biso, mikanda oyo batángi kotánga ekoki kosalisa banani?
3 Na mosala ya kosakola: Bato ya teritware na biso oyo bamonaka ete bazali na ntango mingi te ya kotánga, bakoki kondima koyoka mikanda oyo batángi kotánga. Tokoki kokutana na bato oyo balobaka monɔkɔ mosusu mpe oyo bakoki kondima nsango ya Bokonzi soki bayoki yango na ‘monɔkɔ na bango mpenza oyo babotamá na yango.’ (Mis. 2:6-8) Na bisika mosusu, bato bamesaná koyoka masolo. Na ndakisa, epai ya bato ya Hmong, mibange bazalaka na momesano ya kobɛtela bilenge masolo ya mboka na bango mpe bakangaka makambo yango na motó. Na bikoló mingi ya Afrika, bato basepelaka koyekola makambo na nzela ya masolo.
4. Mituna nini tosengeli komituna mpo na kosalisa bato ya teritware na biso?
4 Na teritware na bino, koyokisa moto lisolo moko oyo batángi kotánga na monɔkɔ na ye ekoki kobimisa litomba? Kotindela moto botángi ya mokanda moko na e-mail ekoki nde kosalisa ye? Tokoki kozwa botángi ya mokanda moko mpe kotya yango na CD mpo na kopesa moto moko oyo asepeli, ntango mosusu nzela moko na mokanda yango. Buku nyonso, mwa buku, zulunalo, to trakte oyo totindeli moto na Internet na mobimba na yango, tokoki kotánga yango na lapolo na biso. Mikanda oyo batángi kotánga ebongisami mpo tósalela yango na boyekoli na biso moko mpe mpo na kolona mboto ya solo ya Bokonzi.—1 Ko. 3:6.