“Oyo Nzambe akangisi esika moko . . .”

Mibeko ya Moize esɛngaki mobali oyo alingi koboma libala akoma mokanda ya koboma libala. Yango ezalaki kopekisa mibali báwela koboma mabala na bango. Kasi, na mikolo ya Yesu, bakonzi ya mangomba bakómisaki koboma libala likambo ya pɛtɛɛ. Mibali bakokaki koboma libala na basi na bango mpo na likambo nyonso. (“mokanda ya kobengana mwasi” nɔti mpo na koyekola na Mr 10:4, nwtsty-E; “abomi libala na mwasi na ye,” “azali kosalela ye ekobo” banɔti mpo na koyekola na Mr 10:11, nwtsty-E) Yesu amonisaki polele ete Yehova nde apesá bato nzela bábalaka mpe ye nde Mobandisi ya libala. (Marko 10:2-12) Mobali ná mwasi basengeli kokóma “mosuni moko” mpe kofanda libela. Ntina se moko oyo Makomami endimi koboma libala, ezali “pite” ndenge mpe mokanda ya Matai emonisi yango.​—Mt 19:9.

Lelo, bato mingi batalelaka libala te ndenge Yesu atalelaki yango, kasi nde lokola Bafarisai. Soki matata ebimi, bawelaka koboma libala. Kasi, na lisangá, baoyo babalá bazwaka elako ya libala na lisɛki te mpe basalaka makasi básalela mitinda ya Biblia mpo na kolonga mikakatano. Nsima ya kotala video Bolingo mpe limemya esalisaka libala ezala na bomoko, yanolá na mituna oyo:

• 

  Ndenge nini okoki kosalela toli oyo ezali na Masese 15:1 na libala na yo, mpe mpo na nini ezali na ntina?

• Ndenge nini kosalela toli oyo ezali na Masese 19:11 ekoki kosalisa yo kokima mikakatano?

• Soki libala na yo elingi ekufa, na esika okanisa: ‘Naboma libala?’ osengeli nde komituna mituna nini?

• Ndenge nini kosalela etinda oyo ezali na Matai 7:12 ekoki kokómisa yo mobali to mwasi malamu?