Ozali na mposa ya kokɔta na Eteyelo ya bapalanganisi ya nsango malamu ya Bokonzi

Ozali na mbula kobanda 23 tii 65 mpe ozali na mosala ya ntango nyonso? Ozali na nzoto kolɔngɔnɔ, mpe okoki kosala esika nyonso oyo mposa ezali? Soki eyano na yo ezali “ɛɛ” na mituna wana, okanaka kotondisa formilɛrɛ mpo na Eteyelo ya bapalanganisi ya nsango malamu ya Bokonzi? Kobanda na kelasi na yango ya liboso, bankóto ya bandeko, ezala babalani, basi to mibali oyo bazali minzemba batondisaka formilɛrɛ yango. Ata bongo tozali nde na mposa mingi ya bandeko mibali oyo bazali minzemba. Sɛngá Yehova apesa yo mposa ya kosepelisa ye mpe ya komekola Mwana na ye. (Nz 40:8; Mt 20:28; Ebr 10:7) Mpe na nsima, talelá ndenge oyo okoki kobongola makambo na yo mosusu ya bomoi mpo okokisa masɛngami.

Mabaku nini bandeko yango bazwaka nsima ya kozwa formasyo wana ya Teokrasi? Batindaka bango na bateritware ya minɔkɔ mosusu to na bisika ya bato mingi to mpe bingumba minene. Na nsima ya mwa ntango bandeko yango mosusu basalaka lokola bakɛngɛli ya zongazonga basungi, bakɛngɛli ya zongazonga, to bamisionɛrɛ oyo bazali kosala na teritware. Wana ozali kokanisa na ndenge okoki komipesa na mosala ya Yehova, kobosana te maloba oyo mosakoli Yisaya alobaki: “Ngai oyo! Tindá ngai.”​—Yis 6:8.

TALÁ VIDEO BAMISIONƐRƐ OYO BASALAKA NA TERITWARE​—BASALI NA MOSALA YA KOBUKA MBUMA, MPE NA NSIMA YANOLÁ NA MITUNA OYO:

• 

  Ndenge nini baponaka bamisionɛrɛ oyo basalaka na teritware?

• 

  Mosala nini ya malamu bamisionɛrɛ oyo basalaka na teritware basalaka?

• 

  Wapi mwa mapamboli oyo mosala ya misionɛrɛ epesaka?