NDENGE YA KOTIKA KOYINA BASUSU

2 | Kozongisa mabe na mabe te

Liteya ya Biblia:

“Bózongisela moto mabe na mabe te. . . . Soki likoki ezali, soki etaleli kaka bino, bózala na kimya na bato nyonso. Bózongisela ye mabe te, . . . mpo ekomamá ete: ‘“Kozongisa mabe ezali likambo na ngai; ngai nakozongisa mabe,” Yehova alobi bongo.’”—BAROMA 12:17-19.

Yango elimboli nini?

Atako moto akoki koyoka nkanda soki basali ye mabe, Nzambe alingaka likambo ya kozongisela moto mabe na mabe te. Kasi, azali kolendisa biso tózela ye mpo mosika te, akosembola makambo nyonso ya mabe.—Nzembo 37:7, 10.

Oyo okoki kosala:

Lokola tozali bato ya kozanga kokoka, soki tozali kozongisela bato mabe na mabe, koyinana ekosila te. Yango wana, soki moto atumoli yo to asali yo mabe, kozongisela ye mabe na mabe te. Zalá na komipekisa mpe salá makambo na ndenge ya kimya. Ntango mosusu, ekozala malamu obosana likambo oyo esalemaki. (Masese 19:11) Kasi soki omoni ete ezali malamu olobela likambo yango, kokakatana te kolobela yango. Na ndakisa, soki basali yo likambo moko ya mabe mpenza, okoki kofunda likambo yango epai ya bapolisi to epai ya bakonzi mosusu.

Ezaleli ya koyina basusu ebebisaka moto ye moko

Bongo soki emonani ete lolenge ya kosilisa likambo moko na kimya ezali te? To soki osali nyonso oyo okoki mpo na kosilisa likambo yango na kimya kasi esimbi te? Kozongisa mabe na mabe te. Yango ekobebisa nde makambo. Kasi, soki oboyi kozongisa mabe na mabe, koyinana ekosila. Okoki kotyela Nzambe motema mpo asilisa likambo yango. “Talelá ye, mpe ye moko akosala.”—Nzembo 37:3-5.

Likambo moko oyo esalemaki mpenza—ADRIÁN

Alongaki momeseno ya kozongisa mabe na mabe

Ntango Adrián azalaki elenge, azalaki koyina bato mpe yango esalaki ete akóma kobunda na babalabala mpo na kozongisa mabe na mabe. Alobi boye: “Mbala mingi tozalaki kobunda na mindoki mpe mbala mingi nazalaki kokóma nzoto makilamakila mpe kotikala lokola ebembe na nzela.”

Adrián abandaki koyekola Biblia ntango azalaki na mbula 16. Abakisi boye: “Ntango boyebi na ngai ya Biblia ekómaki kobakisama, namonaki ete nasengeli kobongola bomoto na ngai.” Asengelaki kotika ezaleli ya koyina basusu, mobulu mpe bitumba. Asepelaki mingi na makambo oyo ayekolaki na Baroma 12:17-19 na likambo etali kotika kozongisa mabe na mabe. Alobi boye: “Nakómaki kondima ete Yehova akosambisa makambo ya kozanga bosembo na ndenge na ye mpe na ntango oyo alingi. Mokemoke, natikaki ezaleli na ngai ya mobulu.”

Mokolo moko na mpokwa, bato ya mobulu oyo bazaláká kala kobunda na Adrián ná baninga na ye, bayaki kobundisa ye. Mokonzi ya bato ya mobulu yango agangaki boye: “Soki ozali mobali bundá!” Adrián alobi ete ‘nayokaki mpenza mposa ya kobunda.’ Kasi na esika ya kobunda, abondelaki Yehova na kati ya motema mpe alongwaki wana.

Abakisi boye: “Likambo ya kokamwa, elenge yango ayaki liboso na ngai mpe alobaki boye: ‘Limbisá ngai mpo na oyo elekaki lobi na mpokwa. Nazali nde na mposa nakóma lokola yo. Nazali na mposa ya koyekola Biblia.’ Esalaki ngai esengo ndenge napekisaki nkanda na ngai! Yango nde esalaki ete nayekola ná ye Biblia.”