1 | Libondeli ‘Bóbwakela ye mitungisi na bino nyonso’

BIBLIA ELOBI: “Ntango bozali kobwakela ye mitungisi na bino nyonso, mpo atyelaka bino likebi.”—1 PETRO 5:7.

Yango elimboli nini

Yehova Nzambe azali kosɛnga na biso ete tóbwakela ye mokumba na biso nyonso oyo ezali lokola kilo na makanisi mpe mitema na biso. (Nzembo 55:22) Mokakatano moko te ezali monene to moke mpo na kobondela mpo na yango. Soki ezali kotungisa biso, ezali mpe kotungisa Yehova. Kobondela Yehova ezali lolenge moko oyo ekosalisa biso tózwa kimya ya makanisi.—Bafilipi 4:6, 7.

Ndenge nini yango ekoki kosalisa

Ntango tozali kotungisama na maladi ya makanisi, tokoki mbala mosusu komiyoka ete tozali biso moko. Bato mosusu bakoki te koyeba ntango nyonso makambo oyo ezali kokómela biso. (Masese 14:10) Kasi ntango tofungoleli Nzambe motema na nzela ya libondeli mpe toyebisi ye ndenge oyo tozali komiyoka, ntango nyonso akoyoka biso mpe akoyanola biso. Yehova amonaka biso, ayebi mpasi mpe mikakatano na biso, mpe alingi ete tóbondela ye mpo na mikakatano nyonso oyo ezali kokómela biso.—2 Ntango 6:29, 30.

Kobondela Yehova esalisaka biso tókómisa lisusu kondima na biso makasi ete atyelaka biso likebi. Tokoki komiyoka ndenge mokomi ya nzembo abondelaki: “Omoni mpasi na ngai; oyebi bampasi ya molimo na ngai.” (Nzembo 31:7) Tóbosana te ete Yehova amonaka makambo nyonso oyo ezali kokómela biso mpe akosala nyonso mpo na kosalisa biso ya kolonga mikakatano ya ntango oyo ya mpasi. Kasi asukaka kaka te na kotala bampasi na biso. Ayebi malamu makambo oyo tozali kokutana na yango koleka moto mosusu nyonso, mpe asalisaka biso tozwa libɔndisi mpe makasi na nzela ya Biblia.

Ndenge oyo Biblia esalisaka bato oyo bazali kobɛla na makanisi Julian

Makambo oyo kotungisama na makanisi esalaki ngai

“Nanyokwamaka makasi na makanisi. Kotungisama na makanisi eyelaka ngai ntango nyonso. Ntango moko nakoki kozala malamu, kasi bantango mosusu nakómaka komitungisa makasi ata soki likambo moko esalemi te. Nakómaka komitungisa mingimingi soki nazali zingazinga na bato mosusu. Nakómaka komitungisa makasi mpo na makambo oyo bakoki kokanisa mpo na ngai.”

“Baninga na ngai oyo bayebi mokakatano na ngai basalisaka ngai mingi mpenza. Na bantango mosusu makambo oyo balobaka ekoki kosalisa ngai te. Kasi nasepelaka mingi mpenza na ndenge basalaka makasi mpo na kosalisa ngai.

“Na bantango mosusu, kotungisama makasi ya makanisi esalaka ete ekóma mpasi mpo na ngai nabondela. Esɛngaki milende mingi mpo nazwa kimya ya makanisi mpe nakóma kosolola lisusu na Yehova na nzela ya libondeli. Makanisi na ngai ebongwanaka mbala moko mpe yango esalaka ete mbala mingi nabulungana na makanisi. Ntango makanisi na ngai ebulungani, yango esalaka ete ezala mpasi ya koyebisa Yehova ndenge oyo nazali komiyoka.”

Ndenge oyo Biblia esalisaki ngai

“Nayekolaki na Biblia ete mpo Nzambe andima mabondeli na biso esɛngi kaka te ezala molai to koloba mingi. Na bantango mosusu soki nazali kokoka te koloba ndenge nazali komiyoka, nalobaka kaka: ‘Yehova, salisá ngai.’ Yango esalisi ngai namona ete Yehova ayokaka ngai mpe ayanolaka ngai na ntango oyo ebongi na makambo oyo nasɛngaka ye. Longola libondeli, nazwaki mpe lisalisi ya monganga. Nazali na esengo mpo na nzela ya libondeli mpe lisalisi ya monganga, esalisi ngai nayoka malamu na makanisi koleka ndenge nazalaki liboso. Atako esɛngaki kosala milende mingi mpo na kosɛnga Tata na ngai ya likoló lisalisi, nasalaki yango mpo nayebaki ete alingaka ngai mpe azali na mposa ya kosalisa ngai.”