Mituna ya batángi

“Likanisi” nini Yehova akotya na mitema ya bikólo mosika te?

Na oyo etali ebandeli ya bolɔzi monene, Emoniseli 17:​16, 17 elobi boye: “Maseke zomi oyo omonaki, ná nyama mabe, ekoyina mwasi wana ya ndumba, ekopanza ye, ekotika ye bolumbu, ekolya misuni na ye, ekozikisa ye na mɔtɔ nyɛɛ. Mpo Nzambe atye yango na mitema na bango mpo na kokokisa likanisi na ye, ɛɛ mpo na kokokisa likanisi na bango kaka moko ya kopesa nyama mabe bokonzi na bango.” Mikanda na biso elobaki ete “likanisi” yango oyo Yehova akotya na motema ya bikólo ezali nde ya kobebisa mangomba ya lokuta.

Kasi, esengeli kosembola ndimbola yango. “Likanisi” oyo Yehova akotya na mitema ya bikólo ezali ete bakopesa “nyama mabe bokonzi na bango.” Mpo na komona ndenge oyo ekokokisama, tótalela mituna oyo elandi.

Esakweli yango elobeli mingi banani? ‘Mwasi ya ndumba’ oyo abengami mpe “Babilone Monene”; azali komonisa lisangá ya mangomba ya lokuta ya mokili mobimba. “Nyama mabe moko ya langi ya motane makasi” oyo ezali elembo ya ebongiseli ya kotya kimya, oyo etyamaki na 1919 Société des Nations mpe sikoyo ezali ONU. (Em. 17:​3-5) “Maseke zomi” ezali komonisa baguvɛrnema nyonso oyo epesaka nyama mabe mabɔkɔ.

Boyokani nini ezali kati na mwasi ya ndumba ná nyama mabe ya langi ya motane makasi? Mwasi ya ndumba “afandeli” nyama mabe, elingi koloba azali kopambola yango mpe kotinda yango esala makambo, to kutu kokonza yango.

Nini ekokómela mwasi ya ndumba? Nyama mabe, elongo na maseke zomi oyo ezali kopesa yango mabɔkɔ, “ekoyina mwasi wana ya ndumba.” Mpo na komonisa koyina na bango, bakopunza bozwi na ye nyonso mpe bakobimisa mabe na ye nyonso. Mpe bakokokisa lisambisi oyo Yehova akatelá mwasi yango, elingi koloba kobebisa ye mpo na libela. (Em. 17:1; 18:8) Yango nde ekosukisa mangomba nyonso ya lokuta. Kasi, liboso ete likambo yango esalema, Yehova akosala ete bikólo esala likambo moko oyo esalemá naino te banda bato babandá koyangela.

Yehova akotinda bikólo esala nini? Akotya na motema ya maseke zomi “likanisi na ye,” elingi koloba ete “[epesa] nyama mabe [ya langi ya motane makasi, to ONU] nguya mpe bokonzi na bango.” (Em. 17:13) Kanisá oyo yango elimboli. Baguvɛrnema ya bato ekozwa ekateli kaka yango moko ete epesa nyama mabe nguya mpe bokonzi na bango? Te! Esakweli emonisi ete Nzambe ye moko nde akosala ete básala likambo yango. (Mas. 21:1; talá mpe Yisaya 44:28.) Nguya yango ekopesama malɛmbɛmalɛmbɛ? Te! Emonani ete ekosalema na mbalakaka, ekozala mbongwana ya nokinoki. Na nsima, nyama mabe oyo euti kozwa nguya ekokokisa lisambisi ya Yehova mpo na mangomba ya lokuta mpe ekolongola yango nyonso mpo na libela.

Na yango likambo nini tosengeli kozela? Tosengeli te komizela komona likambo yango na nzela ya bansango oyo ezali komonisa ndenge baguvɛrnema ezali kopesa ONU mabɔkɔ mokemoke. Likambo oyo tosengeli nde kozela yango oyo: Na ndenge ya mbalakaka mpenza, Yehova akotya na mitema ya bikólo likanisi ya kopesa nyama mabe nguya na bango. Ntango likambo yango ekosalema, tokoyeba ete bolɔzi monene elingi kobanda. Liboso likambo yango esalema, “tózala nde ekɛngɛ mpe tóbatela makanisi na biso” mpo mosika te bambongwana ya mbalakaka ekosalema!—1 Tes. 5:6.