Nani akobatela bana-mboka?​—Biblia elobi nini?

Lapolo moko ya ONU elobi:

• Kobanda mokolo ya 07/10 tii mokolo ya 23/10/2023, bitumba ya Gaza ná Israël ebomi bato koleka 6 400 mpe bato 15 200 bazwi makama, mingi na bango ezali bana-mboka oyo bazali kobunda te. Bakisá mpe bankóto ya bato oyo bakimi bandako na bango.

• Banda etumba ya Russie ná Ukraine ebandi tii na mokolo ya 24/09/2023, bana-mboka 9 701 bakufi mpe bato 17 748 bazwaki makama na Ukraine.

Elikya nini Biblia epesi bato oyo bazali konyokwama mpo na bitumba?

Biblia epesi elikya

Biblia esakoli ete Nzambe ‘akosilisa bitumba na mabele mobimba.’ (Nzembo 46:9) Akosalela guvernɛma moko ya likoló, to bokonzi, oyo ekozwa esika ya baguvernɛma ya bato. (Danyele 2:44) Bokonzi ya Nzambe ekosunga bato.

Talá oyo Yesu Kristo, Mokonzi ya Bokonzi ya Nzambe akosala:

• “Akobikisa mobola oyo azali kolela mpo na kosɛnga lisalisi,ná moto mpamba mpe moto nyonso oyo azali na moto ya kosalisa ye te. Akoyokela moto mpamba ná mobola mawa, mpe akobikisa bomoi ya babola. Akobikisa bango na monyoko mpe na mobulu.”​—Nzembo 72:12-14.

Na nzela ya Bokonzi na ye, Nzambe akosilisa nyɛɛ minyoko mpe bampasi oyo bitumba ebimisaka.

• “Akopangwisa mai ya miso nyonso na miso na bango, mpe liwa ekozala lisusu te, matánga te, koganga te, mpasi mpe ekozala lisusu te. Makambo ya kala eleki.”​—Emoniseli 21:4.

Mosika te Bokonzi ya Nzambe ekomema mbongwana monene awa na mabele. Biblia esakolaki “bitumba mpe bansango ya bitumba” oyo tozali komona lelo. (Matai 24:6) Makambo oyo mpe mosusu oyo ezali kosalema elakisi ete tokómi na “mikolo ya nsuka” ya boyangeli ya bato.​—2 Timote 3:1.