Bato bazali lisusu kotyela bato ya politiki motema te​—Biblia elobi nini?

Na mobu 2024, bikólo mingi na mokili ekosala maponami. Nzokande, bato mingi bazali lisusu kotyela bato ya politiki motema te.

• Ankɛtɛ moko emonisi ete bato mingi na États-Unis balobi ete “bato ya politiki mingi balukaka kaka matomba na bango moko” na esika ya koluka matomba ya bana-mboka nyonso.a​—Pew Research Center, 19/09/2023.

Bilenge mingi mpe batyelaka bato ya politiki motema te.

• “Ntango mosusu bilenge balingaka kokɔta na makambo yango, kasi na ankɛtɛ, bilenge yango balobi ete bato bakokoka te kozwa solisyo ya makambo oyo etali bango.”​—The New York Times, 29/01/2024.

• “Na kotalela ankɛtɛ moko, bilenge bazali kotyela ba “Youtubeur” motema mingi koleka bato ya politiki.”​—The Korea Times, 22/01/2024.

Tokoki mpenza kondima ete bato ya politiki bakobongisa makambo? Nani nde tokoki kotyela motema?

Moto nyonso azali moto ya kotyela motema te

Ezali malamu koyeba naino moto oyo olingi kotyela motema. Biblia elobi ete “moto oyo azangi mayele andimaka liloba nyonso, kasi moto ya ekɛngɛ akanisaka liboso ya kosala likambo.”​—Masese 14:15.

• Mpo na koyeba batoli mosusu ya ntina oyo ekosalisa yo oyeba likambo oyo ebongi kotyela motema to te, tángá lisolo “Nasala nini mpo namibatela na bansango ya lokuta?.”

Lisusu, ata bato ya politiki oyo bazali sembo mpe na makanisi malamu bazali na makambo mosusu oyo bakoki kosala te. Yango wana Biblia ekebisi biso:

• “Bótia mitema na bakonzi ya mokili té; po nguya ya bato ekoki kobikisa té.”​—Nzembo 146:3, Bible na lingala ya lelo oyo.

Mokonzi oyo abongi kotyelama motema

Biblia emonisi ete Nzambe atye mokonzi oyo aleki bakonzi nyonso na makoki mpe oyo abongi mpenza kotyelama motema: Yesu Kristo. (Luka 1:32, 33) Yesu azali Mokonzi ya Bokonzi ya Nzambe, guvernɛma oyo ezali koyangela sikoyo na likoló.​—Matai 6:10.

• Luká koyeba mpo na nini okoki kotyela Yesu motema mpe makambo oyo akosala mpo na kosilisa mikakatano oyo tozali kokutana na yango. Tángá lisolo “Nani azali Mokonzi ya Bokonzi ya Nzambe?” mpe “Bokonzi ya Nzambe ekosala makambo nini?”