NDENGE BAVƐRSƐ YA BIBLIA ELIMBOLAMI
Masese 17:17—‘Moninga alingaka ntango nyonso’
“Moninga ya solosolo alingaka ntango nyonso mpe azali ndeko oyo abotami mpo na bantango ya mpasi.”—Masese 17:17, Biblia—Libongoli ya Mokili ya Sika.
“Moninga ya solo alakisaka bolingo na ye tango nyonso; ndeko ya solo oyo amonanaka na tango ya pasi.”—Masese 17:17, Bible na Lingala ya lelo oyo.
Ndenge Masese 17:17 elimbolami
Baninga ya solosolo ezali baoyo babongi kotyelama motema. Lokola bandeko ya libota moko, bazalaka sembo mpe basalisanaka, mingimingi na ntango ya mpasi.
“Moninga ya solosolo amonisaka bolingo ntango nyonso.” Maloba yango ekoki mpe kobongolama na “moninga ya solosolo alakisaka bolingo na ye ntango nyonso.” Liloba ya Ebre oyo esalelami mpo na “bolingo” na vɛrsɛ oyo esuki kaka te na ndenge oyo ozali koyoka mpo na moto moko. Ezali bolingo oyo elukaka matomba na yango moko te mpe oyo emonanaka na misala. (1 Bakorinti 13:4-7) Baninga ya ndenge wana bakangamaka makasi ntango boyokani na bango emekami, ntango bayokani te na likambo moko boye to mpo na mikakatano ya bomoi. Balimbisanaka mpe na motema moko. (Masese 10:12) Mpe moninga ya ndenge wana ayokelaka moninga na ye zuwa te ntango makambo na ye ezali kosimba. Kutu, asepelaka nde elongo na moninga na ye.—Baroma 12:15.
“Moninga ya solosolo . . . azali ndeko oyo abotami mpo na bantango ya mpasi.” Lisese yango ebimisi likanisi oyo emonisi ete bandeko ya libota moko bakoki kozala mpenza na boyokani ya penepene. Na yango, soki tozali kosala oyo tokoki mpo na moninga moko oyo azali kolekisa ntango moko ya mpasi, tozali kosala kaka ndenge ndeko mwasi to ndeko mobali ya libota akoki kosala. Nzokande, mikakatano elɛmbisaka te boyokani na bango. Kutu, na ntango ya mpasi boyokani na bango ekómaka makasi koleka mpo bamoniselanaka bolingo mpe limemya.
Mpo na nini Masese 17:17 ekomamaki?
Mokanda ya Masese epesaka makanisi ya bwanya mingi oyo ekomamá na ndenge ya mokuse, mpe oyo ekoki kotinda motángi akanisa. Mokonzi Salomo nde akomaki biteni mingi ya mokanda yango ya Biblia. Asaleli lolenge ya ekomeli ya ntɔ́ki ya Ebre. Asaleli te maloba oyo ezali koyokana ndenge moko na matoi, kasi asaleli nde maloba oyo ekokani na mosusu to oyo ekeseni na yango. Na maloba oyo asaleli, molɔngɔ moko ekoki kobakisa makanisi na molɔngɔ mosusu to mpe kolobela makanisi oyo ekeseni na yango. Masese 17:17 ezali ndakisa ya maloba oyo ekokani, eteni ya mibale ya vɛrsɛ yango ezali kobakisa makanisi na eteni ya liboso. Masese 18:24 ezali ndakisa ya makanisi oyo ekeseni. “Baninga mosusu bazalaka pene ya kosalana mabe, kasi moninga mosusu akangamaka makasi koleka ndeko.”
Ekoki kozala ete ntango azalaki kokoma Masese 17:17, Salomo azalaki kokanisa boninga makasi oyo tata na ye Davidi azalaki na yango elongo na Yonatane, moko ya bana ya Saulo. (1 Samwele 13:16; 18:1; 19:1-3; 20:30-34, 41, 42; 23:16-18) Atako Davidi ná Yonatane bazalaki bandeko ya mosuni te, bazalaki na boyokani ya makasi lokola bandeko ya libota moko. Yonatane atyaki kutu bomoi na ye na likama mpo na moninga na ye.a
Ndenge mabongoli mosusu esaleli Masese 17:17
“Moninga ya solo alakisaka bolingo na ye tango nyonso; ndeko ya solo oyo amonanaka na tango ya pasi.”—Bible na Lingala ya lelo oyo.
“Moninga akolingaka ntango yɔnsɔ; ndeko abotami mpɔ na ntango na mpasi.”—Bible Haut-Fleuve.
“Moninga alingaka ntango nyonso, mpe akómaka ndeko na bantango ya mpasi.”—The Bible in Basic English.
Talá mwa video oyo ya mokuse mpo na koyeba makambo oyo mokanda ya Masese elobeli.
a Talá lisolo “Basalaki boninga makasi mpenza.”