Mpo na nini Nzambe ayanolaka na mabondeli nyonso te?

“Ntango ozali kobondela, kozongela kaka maloba wana mbala na mbala te.”​—Matai 6:7.

Yehova alingaka te tózongelaka mabondeli oyo tokangá na motó to oyo totángaka na buku. Kasi, alingaka nde tóloba makambo oyo ezali na motema na biso. Okoyoka ndenge nini soki ozali na moninga oyo azali koyebisa yo kaka maloba moko mokolo na mokolo? Baninga ya motema balobanaka polele makambo oyo ezali kouta na motema. Ntango tozali kobondela Tata na biso ya likoló na maloba na biso moko, tozali komonisa ete azali mpenza moninga na biso ya motema.

“Bosɛngaka, kasi bozwaka te, mpo bozali kosɛnga na mokano ya mabe.”​—Yakobo 4:3.

Toyebi ete Nzambe akoyanola na mabondeli na biso te soki tosɛngi ye biloko oyo akolinga te tósala to oyo akosepela te tózala na yango. Na ndakisa, soki moto abɛtaka masano ya mbongo mpe abondeli Nzambe asalisa ye azala na makila malamu to chance ya kozwa mbongo, okanisi ete Yehova akondima libondeli na ye? Yehova ayebisi biso polele ete tózala na lokoso te, mpe tóndima makambo ya lokuta te, lokola makambo ya makila malamu to chance. (Yisaya 65:11; Luka 12:15) Tokoki kokanisa ata moke te ete Yehova akoyanola na mabondeli ya ndenge wana! Mpo Nzambe ayanola na mabondeli na biso, tosengeli kosɛnga makambo oyo ezali na boyokani na oyo ayebisi biso na Biblia.

“Ye oyo alongoli litoi na ye ete ayoka mobeko te​—ata libondeli na ye ezali eloko moko oyo eyinamá.”​—Masese 28:9.

Na ntango ya kala, Nzambe azalaki koyanola te na mabondeli ya baoyo bazalaki kotosa te mibeko na ye ya sembo. (Yisaya 1:15, 16) Nzambe abongwaná te. (Malaki 3:6) Soki tolingi Nzambe ayanola na mabondeli na biso, tosengeli kosala nyonso oyo ekoki mpo na kotosa mibeko na ye. Bongo soki tosalá makambo ya mabe na kala? Yango elingi koloba ete Yehova akoyoka biso lisusu ata moke te? Ezali bongo te! Nzambe akolimbisa biso na bolingo mpenza soki tobongwani mpe tosali nyonso mpo tósepelisa ye.​—Misala 3:19.