Mituna ya batángi . . .

Esengeli kobatisa babebe?

▪ Victoria alobi boye: “Nazalaki kobanga ete leki na ngai John atikala na limbe.” Mpo na nini azalaki kokanisa bongo? Alobi boye: “John akufaki liboso azwa batisimo mpe sango alobaki ete lokola azwaki batisimo te, akotikala libela na limbe.” Likambo wana ebangisaka mpenza bato, kasi euti mpenza na Biblia? Biblia eteyaka ete bana oyo bakufi liboso bázwa batisimo bakotikala libela na epongelo?

Ya solo, Biblia eteyaka ete bakristo basengeli kobatisama. Yesu alobaki na bayekoli na ye ete: “Bókómisa bato bayekoli na bikólo nyonso, bóbatisa bango na nkombo ya Tata mpe ya Mwana mpe ya elimo santu, bóteya bango bátosa makambo nyonso oyo napesi bino mitindo.” (Matai 28:19, 20) Tomoni ete bato oyo babongi kozwa batisimo basengeli kozala bayekoli ya Yesu. Yango elingi koloba ete bazali bato oyo bayekolaki mateya ya Yesu mpe baponi kolanda ye, ekateli oyo bebe akoki kozwa te.

Atako bongo, bato mingi balobaka ete maloba ya Yesu etaleli mpe bana mike. Richard Bucher, pastɛrɛ moko ya Lingomba ya Protesta, alobaki ete: “Bato nyonso basengeli kobatisama, ata mpe babebe.” Abakisaki boye: “Koboya kobatisa bango ezali kokangela bango nzela ya kolimbisama masumu mpe yango ekoki komema bango na lifelo.” Kasi, makanisi yango eyokani te na mateya ya Yesu na makambo soki misato.

Ya liboso, Yesu ateyaki te ete esengeli kobatisa babebe. Likambo yango ezali na ntina nini? Tókanisa naino: Yesu ateyaki bayekoli na ye mateya ya Nzambe. Ntango mosusu azalaki kozongela mateya ya ntina. Mpo na nini? Mpo na kosalisa bango bákanga ntina na yango malamu. (Matai 24:42; 25:13; Marko 9:34-37; 10:35-45) Kasi, ata mbala moko te ateyaki ete esengeli kobatisa babebe. Tokanisi ete Yesu abosanaki kolobela likambo yango? Soki moke te! Na ntembe te, soki esengelaki ete babebe bábatisama, Yesu alingaki koloba yango.

Ya mibale, Yesu ateyaki ata mbala moko te ete bato banyokwamaka soki bakufi. Ayebaki maloba ya Biblia oyo elobi polele ete: “Bato ya bomoi bayebi ete bakokufa; kasi bakufi bayebi ata eloko moko te.” (Mosakoli 9:5) Yesu ayebaki ete bakufi bakendaka na epongelo te, na limbe te, na lifelo te, to na esika mosusu te. Kutu, ateyaki ete bayebaka eloko te, bazalaka lokola moto oyo alali mpɔngi.​—Yoane 11:1-14.

Ya misato, Yesu ateyaki ete “baoyo nyonso bazali na kati ya malita” bakosekwa. (Yoane 5:28, 29) Na ntembe te, na kati na bango ekozala na bamilio ya bato oyo bazwá batisimo te. Ntango bakosekwa, bakoyekola makambo ya Nzambe mpe bakopesa bango libaku ya kozala na bomoi ya seko na Paradiso awa na mabele.a​—Nzembo 37:29.

Na mokuse, tomoni polele ete Biblia eteyaka te ete esengeli kobatisa babebe.

[Maloba na nse ya lokasa]