Tólonga mokakatano ya boinga

¹ Na boumeli ya mobu ya mosala oyo eleki, pene na bandeko basi mpe mibali 972 bayekolaki kotánga mpe kokoma kati na teritware mobimba oyo etambwisami na filiale na biso. Atako matomba yango ezali kosepelisa, nzokande mosala ezali naino mpo na kolakisa bato ete báyeba kotánga mpe kokoma. Ya solo, boinga ezali naino mokakatano mpo na mosaleli nyonso ya Yehova.

² Tokoki kosala nini mpo na kolonga mokakatano yango mpe kosunga basakoli mingi na koyeba kotánga mpe kokoma? Liboso mpenza, esengeli tóyeba ete ezali Yehova nde alingi ntango nyonso ete basaleli na ye báyeba kotánga. Ezalaki bongo mpo na bato ya sembo nyonso, lokola Abalayama, Yisaka, Yakobo, Yosefe, Mose, libota mobimba ya Yisalaele mpe baklisto ya liboso. (Talá Auxiliaire, lokasa 899, na nse ya moto ya likambo “Lecture.”) Lisusu, uta sikawa kino na mokili ya sika, tosengeli kozwa boyebi mpe kolakisa yango.

³ Mpo na kobundisa makasi boinga, lisangá na mobimba na yango, mpe mingimingi lisangani ya bankulutu, basengeli kokómisa kelasi ya koyekola kotánga mpe kokoma lobanzo na bango ya liboso. Bakɛngɛli-batamboli basili kozwa malako mpo na likambo yango. Tolingi kosala elongo na bango mpo na kolonga biso nyonso mokakatano motali kotánga mpe kokoma. Tózwa bibongiseli nyonso ya malamu mpo na koyekola kotánga mpe kokoma. Tozali na mikanda mibongisami na “moombo ya sembo mpe ya mayele.” Kati na masangá mosusu, kelasi ya koyeba kotánga mpe kokoma etambwisamaka na ntango Eteyelo ya mosala ya Teokrasi ezali kosalema. Nsima ya Lisolo No. 1 mpe ndimbola ya mikapo ya Biblia mpe wana bana-kelasi mosusu bazali kokende na bakelasi na bango, baoyo ya kelasi ya koyekola kotánga mpe kokoma bazali esika moko elongo na molakisi na bango mpo na koyekola kotánga mpe kokoma. Engebene malako ya Eteyelo ya mosala ya Teokrasi, bobele baoyo bayebi kotánga nde bakoki kopesamela mokumba. Ebongiseli wana ezali kolendisa baoyo bayebi kotánga te mpe kokoma te na kosala milende mpo na kokomisa nkombo na Eteyelo nsima ya kolonga na kelasi ya koyekola kotánga mpe kokoma.

⁴ Koyeba kotánga mpe kokoma ezali na litomba bobele te mpo na kokokisa mosala na biso ya kosakola, kasi lisusu kati na bomoi ya mokolo na mokolo. Tosikolami na nsinga ya boinga, na bongo tokoki komileisa biso moko kozanga kotalela basusu. Tokoki kotya motema na lisalisi ya moko na moko mpe na elimo ya Yehova mpo na kolonga mokakatano motali kotánga mpe kokoma. Na kosaláká bongo, bokoli na biso ekomonana polele, mpo na lobiko na biso mpe mpo na lobiko ya baoyo tozali komemela nsango ya Nzambe.​—⁠1 Tim. 4:​13-16.