Bankulutu bazali kotambwisa lisangá—Mikumba ya mokɛngɛli-mokambi
1 Kozala nkulutu na kati ya lisangá ezali mokumba monene. (Mis. 20:28; 1 Tim. 3:1) Oyo ezali lisolo ya liboso kati na molɔngɔ ya masolo oyo makolobela mikumba ndenge na ndenge ya bankulutu baklisto mpo ete biso banso tótalela na motuya mpenza mosala ya ntina oyo bango bazali kosala mpo na bolamu na biso.
2 La Société aponaka mokɛngɛli-mokambi mpo na kosala na boumeli ya eleko moko oyo ezali na ndelo te. Lokola mokɛngɛli-mokambi atambwisaka makambo, yango esalisaka bankulutu mosusu ete bátya likebi na mikumba na bango. (Lisanga, lok. 42) Yango esɛngaka nini?
3 Mokɛngɛli-mokambi azwaka nkoma oyo batindaka na lisangá mpe mbala moko alekisaka yango epai na mokomeli ya lisangá mpo na kobomba yango to kolakisa na bankulutu mosusu. Ntango azali kobongisa makita ya bankulutu, mokɛngɛli-mokambi azwaka makanisi ya bankulutu mosusu likoló na makambo oyo masengeli kotalelama mpe na nsima asalaka manaka mpo na likita yango. Atambwisaka mpe makita ya bankulutu. Ntango bikateli bizwami, akosala ete bikateli yango bikokisama malamu. Atalelaka kobongisama ya likita ya mosala mpe manaka ya masukulu ya bato nyonso. Asengeli kotalela mpe kondima mayebisi nyonso liboso ete mápesama na lisangá, apesaka nzela na kofutama ya bafaktire ya sanza na sanza oyo ezali kosɛnga mosolo, mpe asalaka ete bakɔnti ya lisangá etalelama nsima ya sanza misato nyonso.
4 Lokola azali motambwisi, mokɛngɛli-mokambi atambwisaka mosala ya komite ya mosala ya lisangá. Ntango moyekoli moko ya Biblia asɛngi mpo na kokóma mosakoli oyo azwi naino batisimo te to ntango mosakoli oyo azwi naino batisimo te asɛngi mpo na kozwa batisimo, mokɛngɛli-mokambi akamataka bibongiseli mpo ete bankulutu básolola na ye. Mokɛngɛli-mokambi mpe atambwisaka bibongiseli mpo na koyamba mokɛngɛli ya zongazonza mpo ete lisangá ekoka kozwa matomba mingi na boumeli ya pɔsɔ oyo bakolekisa elongo na mokɛngɛli ya zongazonga.
5 Mokɛngɛli-mokambi azali na mikumba mingi mpe ya ndenge na ndenge. Ntango azali kokokisa mikumba na ye na komikitisa mpe “na etingya,” biso banso tokoki kosala oyo ekoki na biso mpo na kosalana elongo na bankulutu. (Lom. 12:8) Soki tozali na ‘botosi’ mpe na ‘komisɔkisa’ epai na baoyo bazali kokamba biso, bakokokisa mosala na bango na esengo mpenza.—Ebe. 13:17.