Tókolisa makoki na biso ya kosakola—Ndenge ya kosala soki moto aboyi koyoka biso

Mpo na nini ezali na ntina?: Kanisá naino: oyebi ete likama moko ya monene elingi kosalema. Bato bakokufa soki bakimi te. Okei epai ya moto moko oyo afandaka pembeni na bino mpo na kokebisa ye, kasi alingi koyoka yo te, alobi ete azali na mosala. Okotika mbala moko kosalisa ye? Na ntembe te, okotika te! Ndenge moko mpe bato mingi na teritware na biso baboyaka koyoka biso, mpo bayebaka te ete nsango oyo tomemelaka bango ezali mpo na kobikisa bomoi na bango. Ekoki kozala ete ntango tokendaka kotala bango, bazalaka na makambo mosusu oyo ezali kotungisa bango. (Mat. 24:37-39) To mpe bakaniselaka biso mabe mpo na makambo ya lokuta oyo bayoká mpo na biso. (Mat. 11:18, 19) Mbala mosusu bakanisaka ete tokeseni te na mangomba mosusu oyo esalelaka te makambo oyo bateyaka. (2 Pe. 2:1, 2) Soki na ebandeli moto amonisi ete asepeli te koyoka biso, tosengeli mbala moko te kotika ye.

Ndenge ya kosala yango:

Liboso ya kokende kosakola ndako na ndako, zwá mwa miniti mpo na kokanisa makambo oyo bato balobaka mpo na koboya koyoka biso, mpe ndenge ya kosala soki okutani na likambo ya ndenge wana.
Soki moto aboyi koyoka yo, na boboto mpenza, luká ndenge oyo okoki kokoba lisolo. Mbala mosusu, kopesa ye matɔndi na ndenge amonisi likanisi na ye ekoki kosalisa. Na ndakisa, soki alobi ete azali na lingomba na ye, okoki koloba boye: “Nazalaki na elikya ya kokutana na moto oyo asepelaka na makambo ya Nzambe lokola yo.” Ntango mosusu, komemya makanisi ya moto mpe komitya na esika na ye ekoki kopesa yo likoki ya kokoba kosolola na ye. Na ndakisa, soki moto alobi ete azali na mosala, okoki koloba: “Likambo te. Kasi, liboso natika yo, nalingi kopesa yo mokanda oyo.” To mpe, soki moto alobi ete asepelaka na yango te, okoki kotuna ye boye: “Nini esepelisaka yo te, Biblia to mangomba?”
Salelá bososoli. Kobosana te ete Yehova atindaka bato na makasi te báyoka ye. (Mib. 30:19) Liboso ya Yehova, moto na moto akomema mokumba na ye moko. (Gal. 6:5) Soki moto aboyi kaka koyoka biso, eleki malamu kotika ye. Komemya makanisi ya moto ekoki mbala mosusu kopesa nzela ete andima koyoka mosakoli mosusu mbala ya nsima.—1 Pe. 3:15.

Meká kosala boye na boumeli ya sanza:

Ntango ozali kosakola, soki moto aboyi koyoka nsango malamu, nsima ya kotika ye, yo ná ndeko oyo obimi na ye bólobela lolenge malamu oyo bokokaki kosala mpo na kokoba lisolo yango.