Tókolisa makoki na biso ya kosakola​—Kosalisa baoyo ‘bazali na ezaleli oyo ebongi’ bákóma bayekoli

MPO NA NINI EZALI NA NTINA: Yehova asalaka ete mboto ya solo ekola na mitema ya baoyo ‘bazali na ezaleli oyo ebongi mpo na bomoi ya seko.’ (Mis 13:48; 1Ko 3:7) Tosalaka elongo na ye ntango tomipesaka na kosalisa baoyo basalelaka makambo oyo bazali koyekola. (1Ko 9:26) Bayekoli ya Biblia basengeli koyeba ete batisimo ezali na ntina mingi mpo na kozwa lobiko. (1Pe 3:21) Tosalisaka bango bakóma bayekoli ntango toteyaka bango bábongola makambo mosusu na bomoi na bango, bákóma kosakola mpe koteya mpe bámipesa na Yehova.​—Mt 28:19, 20.

NDENGE YA KOSALA YANGO:

• Yebisáká bayekoli ya Biblia ete mokano ya koyekola Biblia ezali ya kosalisa bango “báyekola koyeba” Yehova mpe básepelisa ye.​—Yn 17:3

• Salisá bango bálonga mikakatano; na ndakisa mimeseno ya mabe mpe boninga oyo ebongi te mpo bákola na elimo

• Lendisá bango liboso mpe nsima ya batisimo.​—Mis 14:22

TALÁ VIDEO YEHOVA NZAMBE AKOSALISA YO, MPE NA NSIMA YANOLÁ NA MITUNA OYO:

• Makambo nini ekoki kobangisa moto mpo amipesa te mpe azwa batisimo te?

• Ndenge nini bankulutu bakoki kosalisa bayekoli ya Biblia bákola na elimo?

• Yisaya 41:10 eteyi biso nini mpo na Yehova?

• Bizaleli nini ekosalisa biso tósalela Yehova na ndenge oyo andimaka, atako tozali bato ya kozanga kokoka?