Makambo oyo “Nzambe kaka moko ya solosolo” alaki
YEHOVA NZAMBE atyaki mwasi ná mobali ya liboso na paladiso awa na mabelé—elanga ya Edene. Apesaki bango etinda bábota bana mpe ‘bátya mokili na nse na bango’; yango elingaki koloba koyeisa mokemoke Paladiso, esika bazalaki kofanda, monene wana libota na bango ezali kokóma monene. (Genese 1:26-28; 2:15) Mokano oyo Nzambe azalaki na yango ete bato báfanda na paladiso awa na mabelé ekokokisama mokolo mosusu?
Ɛɛ, ekokokisama! Esakweli moko ya Biblia elobi ete, “[Yehova] akosilisa kufa libela” mpe “akokɔmba mpisoli na bilongi nyonso.” Ntango yango ekosalema, “ekolobama ete: Talá oyo Nzambe na biso; tolambeli ye mpe ye akobikisa biso. Oyo azali [Yehova], tolambeli ye, tiká ete tósepela mpe tóyoka esengo na lobiko na ye.”—Yisaya 25:8, 9.
Mokanda ya nsuka ya Biblia eyebisi ndenge mabelé ekozala ntango mokili ya lelo, to ebongiseli ya makambo oyo Satana azali kotambwisa, ekolongwa. Mpo na ‘mabelé ya sika’ oyo ekozala na bato oyo balingaka Nzambe, Biblia elobi boye: “Hema ya Nzambe ezali elongo na bato, mpe akofanda elongo na bango mpe bakozala bato na ye. Mpe Nzambe ye moko akozala elongo na bango. Mpe akopangwisa mpisoli nyonso na miso na bango, mpe liwa ekozala lisusu te, ná mawa ná koganga ná mpasi ekozala lisusu mpe te.”—Emoniseli 21:1-4.
Oyo nde bilaka kitoko! Tokoki kondima yango? Tótala ndenge liwa ya Yesu lokola mbeka mpe makamwisi oyo asalaki ezali kotinda biso tóndima ete Nzambe akokokisa bilaka nyonso oyo apesaki.—2 Bakolinti 1:20.
Bomoi ya Yesu lokola lisiko
Lokola Satana atindaki Adama aboya kotosa Nzambe mpe asala lisumu, bana nyonso ya Adama basangolá lisumu na ye. Biblia elobi ete: “Kaka ndenge lisumu ekɔtaki na mokili mpo na moto moko mpe liwa mpo na lisumu, ndenge moko mpe liwa epalangani epai ya bato nyonso mpamba te bango nyonso basalaki lisumu.” Atako bongo, Biblia ebakisi boye: “Botosi ya moto kaka moko [Yesu, moto ya kokoka] ekokómisa bato mingi bayengebene.” (Baloma 5:12, 19) Ndenge lisolo ya ebandeli emonisi yango, Yesu azali “Adama ya nsuka,”—oyo ‘autaki na likoló’—oyo apesaki bomoi na ye lokola “lisiko na esika ya bato mingi.”—1 Bakolinti 15:45, 47; Matai 20:28.
Na ndenge yango, bato nyonso oyo bamonisaka kondima epai ya Yesu bakoki kozwa “kosikolama [na lisumu] na nzela ya lisiko” mpe bakoki kozwa bomoi ya seko. (Baefese 1:7; Yoane 3:36) Na ntembe te, tokoki kosepela ete Yehova Nzambe alingaki bato mingi yango wana apesaki Mwana na ye mpo akóma Mobikisi na biso! (Luka 2:10-12; Yoane 3:16) Soki totaleli malamu makambo oyo Yesu asalelaki bato oyo bazalaki konyokwama na ekeke ya liboso, tokoyeba oyo akosala na mikolo ezali koya. Kozanga ntembe, makambo oyo Yesu asalaki ezalaki mpenza kokamwisa!
Ndenge makambo ekozala na mokili ya sika
Yesu azalaki na likoki ya kobikisa moto nyonso ya maladi oyo bamemelaki ye. Ezali na moto moko te oyo ye azalaki na likoki te ya kobikisa, ezala maladi ya ndenge nini. Longola yango, na ndenge ya likamwisi, aleisaki bankóto ya bato bobele na ndambo ya mbisi mpe mampa, mpe asalaki yango mbala na mbala.—Matai 14:14-22; 15:30-38.
Ntango Yesu afungolaki miso ya moto moko oyo abotamaki miso ekufá, bato ya pembeni mpe bato oyo bayebaki ye bandimaki ete Yesu asalaki likamwisi, kasi bakonzi ya mangomba ya Bayuda baboyaki kondima. Yango wana, moto oyo Yesu afungolaki miso na ye atindaki bango bákanisa, alobaki boye: “Banda kalakala eyokamá ata mokolo moko te ete moto moko afungolá miso ya moto oyo abotamá miso ekufá. Soki moto wana autaki epai ya Nzambe te, mbɛlɛ akokaki kosala ata eloko moko te.”—Yoane 9:32, 33.
Ntango Yesu azalaki kosala mosala na ye, Yoane Mobatisi, mwana ya ndeko ya mama na ye, oyo azalaki na bolɔkɔ, atindaki bato mpo na koyeba soki makambo oyo azalaki koyoka mpo na Yesu ezali solo. Biblia elobi ete: “Na ngonga yango [Yesu] abikisaki mingi oyo bazalaki na bamaladi mpe na bampasi ya makasi mpe na bilimo mabe, mpe asalaki ete bato mingi oyo bakufá miso bázwa ngɔlu ya komona.” Na nsima Yesu ayebisaki bato oyo Yoane atindaki bango boye: “Bóyebisa Yoane oyo bomoni mpe oyo boyoki ete: bato bakufá miso bazali komona, batɛngumi bazali kotambola, bato ya maba bazali kopɛtolama mpe bato bakufá matoi bazali koyoka, bakufi bazali kolamuka.”—Luka 7:18-22.
Kanisá naino: Soki likambo moko ya malamu esalemaki na ntango ya kala, yango esengeli te kondimisa yo ete ekoki kosalema lisusu? Na nzela ya makamwisi oyo asalaki, Yesu amonisaki mwa moke makambo oyo akosala na mokili mobimba ntango akozala Mokonzi na Bokonzi ya Nzambe. Makamwisi na ye ezali elembeteli oyo endimisi ete Nzambe atindaki ye mpe ete azalaki mpenza Mwana ya Nzambe.
Ntango Bokonzi ya Nzambe ekoyangela mabelé, bisakweli ya makambo ya kokamwa ekokokisama ndenge mpenza ekomami. Ndenge esakolamaki, miso ya bato oyo bakufá miso ekofungwama, matoi ya bato oyo bakufá matoi ekoyoka, batɛngumi bakopumbwa lokola mboloko, mpe moto moko te akobɛla. Kimya mpe kobatelama ekozala mpe na bisika nyonso na mabelé. Ata banyama oyo lelo bazali likama, bakozala na kimya elongo na bato.—Yisaya 9:6, 7; 11:6-9; 33:24; 35:5, 6; 65:17-25.
Olingi kozala na bomoi ya seko ntango Bokonzi ya Nzambe ekoyangela mabelé, na esika oyo makambo wana nyonso ekozala? Yesu amonisaki oyo osengeli kosala ntango alobaki na libondeli oyo asalaki epai ya tata na ye ete: “Oyo elakisi bomoi ya seko, báyekola koyeba yo, Nzambe kaka moko ya solosolo, mpe moto oyo yo otindaki, Yesu Klisto.” (Yoane 17:3) Kopesa nzela na eloko moko te epekisa yo kokoba kozwa boyebi wana oyo epesaka bomoi.
[Elilingi na lokasa 10]
Talá makambo oyo Nzambe alaki mpo na mabelé