Tosengeli kosalela nkombo ya Nzambe?

NA MOBU 1902, zulunalo moko (The Presbyterian and Reformed Review) elobelaki Biblia American Standard version oyo eutaki kobima na 1901, kasi ezalaki Biblia oyo ebimaká na ekeke ya 17 na nkombo ya King James Version mpe bazongelaki kobongola yango lisusu. Zulunalo yango elobelaki likambo ya koyeba soki ezali malamu to te kosalela nkombo ya Nzambe, Yehova, na bisika nyonso oyo esengeli kozala na Biblia ya Lingelesi; elobaki boye:

“Tozali koyeba te mpo nini bato bazali na makanisi ndenge na ndenge na oyo etali koyeba soki ebongi kosalela nkombo ya Nzambe. Yango ezali nkombo mpenza ya Nkolo, nkombo oyo ye moko amonaki malamu bato na Ye báyeba ye na yango: kotika kosalela nkombo yango mpe kosalela bankombo ya lokumu na esika na yango, ezali mpenza mabe mpo na biso. Ezali solo ete bato bazali kotya ntembe na oyo etali ekomeli ya solosolo ya nkombo yango mpe moto moko te alobi mpenza ete ‘Yehova’ ezali lolenge na yango mpenza. Kasi ekomeli ‘Yehova’ ezali lolenge ebongi mpo na batángi ya lokota Lingelesi; mpe ekozala mpenza komilakisa ya bato ya mayele soki batye nkombo Yahwé na esika ya nkombo yango to na lolenge mosusu nyonso oyo bazali kosalela lelo oyo, kasi ezali mpenzampenza solo te, oyo bato ya mayele na mikanda bazali kokoma. Tozali kotalela ete ezali likambo ya ntina, mpo na mbala ya liboso, ete moto oyo azali kotánga Kondimana ya Kala na Lingelesi, amona nkombo ‘Yehova’ mbala na mbala mpe ayeba nani oyo ‘Yehova’ azalaki mpo na libota na Ye, mpe nyonso oyo asalaki mpo na bato na Ye.”

Mabongoli mosusu mingi ya Lingelesi ezali kosalela nkombo “Yehova” to lolenge mosusu ya nkombo ya Nzambe. Ndenge moko mpe, mabongoli ya nkota mosusu mingi mpe ezali kosalela nkombo ya Nzambe, ndenge ezali komonana na lokasa oyo. Nzambe alobaki na Moize mpo na nkombo na ye, Yehova, boye: “Oyo ezali nkombo na ngai lobiko na lobiko, mpe nakanisama bongo kino libota na libota.” Na yango, ezali na ntembe ata moke te ete tosengeli kosalela nkombo ya Nzambe lelo oyo!​—⁠Exode 3:​13-​15.

[Bililingi na lokasa 31]

Nzembo 83:18 ndenge ezali komonana na minɔkɔ ndenge na ndenge

Tsonga

Shona

Vietnamien

Espagnol

Hindi

Tagalog

Lingelesi