Tozalaka na mposa bálinga biso

Eleki bambula ebele, mwana mwasi moko na nkombo Lea, azalaki kofanda na engumba moko oyo ezalaki na esika oyo ekólo Turquie ezali lelo. Lea azalaki mpenza kitoko te, kasi leki na ye, Laele, azalaki kitoko.

LAELE akutanaki na mobali moko oyo alingaki ye mingi, oyo andimaki kutu kosalela tata na ye mbula nsambo mpo na kobala ye. Kasi, na butu ya mokolo ya libala, tata na ye akɔtisaki yaya na ye Lea na ndako ya libala na esika na ye. Toyebi te oyo Lea akanisaki mpo na mayele mabe ya tata na ye, kasi na ntembe te, ayebaki ete yango ezalaki lolenge malamu te ya kokɔta libala.

Ntango mobali ayebaki ete bapesi ye nde mwasi mosusu, andimaki yango te. Tata alimbolaki ete na bonkɔkɔ na bango, esengeli te kobalisa leki liboso ya yaya. Ndenge wana nde Lea akɔtaki libala epai ya mobali oyo alingaki ye te, kasi alingaki nde leki na ye mpe na nsima abalaki ye. Kanisá mawa oyo Lea asengelaki koyoka ntango azalaki komona mobali azali kolinga mingi leki na ye! Lea ayokaki te esengo oyo elenge mwasi ayokaka ntango azali kokutana na mobali oyo alaki kobala ye, mpe azalaki mpenza te na makambo ya esengo ya kokanisa mpo na mokolo ya libala na ye. Na ntembe te, azalaki mpenza na mposa bálinga ye lokola Laele! Na bongo, mpo na makambo oyo akokaki kobongola yango te, ekoki kozala ete Lea azalaki mbala mingi komona ete mobali alingi ye te mpe azali kosepela na ye te.a

Lelo oyo mpe, na makambo mosusu, bato mingi bakoki komiyoka lokola Lea. Biso nyonso tozalaka na mposa makasi ya kolinga mpe ya komona ete balingi biso. Mbala mosusu tozali na mposa ya kozwa molongani oyo akolinga biso. Tolingaka mpe ete baboti na biso, bana na biso, bandeko na biso, mpe baninga na biso bálinga biso. Lokola Lea, ekoki kozala ete tomonaka bazali kolinga basusu, kasi biso te.

Banda bomwana, toyokaka masolo ya mibali ná basi ya kitoko, oyo balingani, mpe oyo bazalaka na bomoi ya esengo libela na libela. Baalanga-nzembo bakumisaka bolingo, bakomi ya maloba ya ntɔki mpe balobelaka yango mingi. Kasi, moto moko oyo ayekolaki likambo yango akomaki boye: “Ezali mpenza na mosala moko te, to na likambo moko te, oyo ebandaka na esengo mpe na elikya mpenza, kasi mbala mingi esukaka na mawa, lokola bolingo.” Kutu, mbala mingi ezali bato oyo tolingaka mingi nde bayaka koyokisa biso mpasi mingi​—⁠koyokisa biso mawa na esika ya esengo ya solosolo. Na mikili mingi, mabala ebele (40 %) ezali kosuka na kokufa, mpe babalani mingi atako babomi mabala na bango te, bazali mpenza na esengo te.

Na mikili mingi, batata to bamama ebele bazali kobɔkɔla bana bango moko, mabota mingi ezali na boyokani ya malamu te, mpe bana bazali konyokwama mpo na yango. Nzokande, bana basengeli mpenzampenza na libota oyo ekobatela bango, ekolinga bango, mpe ekosalela bango makambo na boboto. Kasi, mpo na nini bolingo ezali lisusu te? Epai wapi tokoki koyekola ezaleli wana ya ntina mingi? Masolo oyo elandi ekotalela mituna wana.

[Maloba na nse ya lokasa]