Kompanyi ya ba ambulance na Londres

EUTI NA MOKOMI NA BISO NA GRANDE-BRETAGNE

ROB ASHFORD, mokambi ya kompanyi ya ba ambulance na Londres, alobi boye: “Mokano na biso ezali tókóma esika bato ya maladi makasi to baoyo bazoki bazali, nsima ya miniti mwambe, ezala bazali wapi na Londres, oyo ezali monene kilomɛtrɛ-kare 1 600. Tosalaka bongo mbala mingi (75 %), atako mbula na mbula makama ezali se kobakisama.”

Babengaki ngai nakende kotala kompanyi ya ba ambulance na Londres, oyo ezali na pembeni ya garɛ Waterloo na ngambo ya sudi ya ebale Tamise. Kompanyi yango, oyo eleki monene na Mpoto mobimba, eyambaka telefone soki 3 000 ya bato oyo babengi nokinoki na mokolo. Kobenga wana eutaka na bato soki milio 7, oyo balobaka minɔkɔ koleka 300. Ndenge nini basali 300 ya kompanyi yango basalaka mpo na kokokisa mosala na bango?

Kokesenisa makama ya minene ná ya mike

Nazalaki kotala mwasi moko ndenge azalaki koyanola na telefone na nimero “999,” nimero ya telefone oyo babengaka nokinoki na ntango ya likama na Grande-Bretagne. Mwasi yango ayebaki mbala moko esika likama ebimi, mpe esika banzela ekutani oyo ezali pene na esika yango. Mbala moko, kalati ya nzela ebimaki na ordinatɛrɛ na ye. Mpo na koyeba nini esengeli kosala liboso, atunaki mituna ebele: Bato boni bazali na mposa ya lisalisi? Ezali basi to mibali mpe bazali na mbula boni? Bazali komiyeba? Bazali kopema? Bazali koyoka mpasi na ntolo? Bazali kobima makila?

Ntango mwasi yango azali kokoma makambo wana, ordinatɛrɛ yango moko ezali komonisa soki likama ezali monene to moke: langi ya motane​—⁠likambo ya nokinoki, bomoi ezali na likama: langi ya mosaka​—⁠ezali likama mpo na bomoi, kasi ezali likambo ya nokinoki te; langi ya mai ya mpondu⁠—⁠ezali likambo ya moke mpe bomoi ezali na likama te. Na nsima, mwasi yango ayebisi moninga na ye ya mosala makambo amoni, ye nde akotinda bato esika likama ebimi.

Kosalisa na esika likama ebimi

Kompanyi yango ezali na ba ambulance 395 mpe mituka 60 mpo na kokóma noki esika likama ebimi. Soki babengi na esika moko, motuka oyo ezali pene na esika yango ekokende. Ezali mpe na batukutuku oyo basekuriste bakendeke na yango esika likama ebimi mpo yango ekoki koleka katikati na mituka oyo etondani na nzela mpo na kokóma esika babengi. Ezali mpe na minganga 12 oyo basalaka butu moi mpo na kosalisa basekuriste.

Kaka ntango nazalaki wana, bapolisi bayebisaki ete likama moko monene ebimi na balabala monene oyo etondani na mituka. Ambulance ekomaki kala na esika yango, kasi bapolisi babengaki na kompanyi kaka. Mpo na nini? Mpo na koyebisa soki bakoki kotinda hélicoptère. Hélicoptère wana ya motane epumbwaka soki mbala 1 000 na mbula moko mpo na komema bato oyo bazwi likama nokinoki na lopitalo. Sekuriste moko mpe monganga moko nde batambwisaka yango mpo na komema bato oyo bazoki makasi na lopitalo Royal London Hospital, epai bakosalisa bango nokinoki.

Na 2004, babandaki kosalela ba velo na libándá ya mpɛpɔ na Heathrow, ndenge ezali na West End, kartye moko ya Londres. Etuluku moko ya mafulume ná basekuriste, bakendeke mbangu na velo esika likama ebimi mpo na kosalisa bato. Velo mokomoko ezali na mwinda ya bule mpe na ngonga ya makasi, ezali mpe na sakosi oyo ememaka nkisi kilo 35, nkisi ya motema, oxygène, mpe bankisi oyo ekitisaka fiɛvrɛ.

Mwa mikolo nsima ya kobanda kosalela ba velo, etuluku yango emonisaki mpenza ete ezali na ntina mingi. Na libándá ya mpɛpɔ Heathrow Terminal 4, mwasi moko ya mbula 35 abɛlaki mpe atikaki kopema. Ntango babengaki na nimero ya 999, basekuriste mibale bayaki noki na velo nsima ya mwa basegɔnde, bapesaki ye oxygène, mpe babandaki mbala moko kofinafina ye mpo azongela kopema. Ambulance moko emɛmaki ye nokinoki na lopitalo ya pene. Ntango abikaki, apesaki basekuriste oyo bamemaki ye matɔndi mpo babikisaki ye.

Mosala yango ezali kokoma monene

Soki moto oyo abengi na 999 ayebi koloba Lingelesi te, moto mosusu akolimbola. Mbala mosusu ezalaka mpasi koyeba lokota ya moto oyo abengi soki azali koloba nokinoki mpo azali kobanga to kolɛnga!

Mpo na kolakisa bato ndenge bakoki kosalisa moto oyo azwi likama, basali filme moko ya mokuse na DVD, oyo ezali na maloba ya Lingelesi. Zulunalo ya kompanyi yango (LAS News), elobi ete mokano ezali ya kolendisa bato ya Londres oyo bautá na Sudi ya Azia “báyekola ndenge ya kosala mpo moto azongela kopema.” DVD yango ezali mpe kolakisa nini kompanyi esalaka ntango babengi na 999.

Bato ya Londres, mboka oyo balobaka nkota ndenge na ndenge, bazali na botɔndi mingi na ndenge minganga bazali kosalisa bato oyo bazwi likama, ezala moto moko to bato ebele, ezala na nse ya mabelé to na babulidingi. Mpo na mibali mpe basi oyo basalaka na kompanyi ya ba ambulance ya Londres, minganga moko ya bolingo malamu alobaki boye: “Bazali mpenza minganga ya malamu koleka minganga nyonso oyo nasalá na bango.” Yango ezali maloba ya botɔndi mpenza mpo na bato oyo basalaka, kasi bafutaka bango te, na kompanyi ya ba ambulance oyo eleki monene na mokili mobimba.

[Etanda na lokasa 11]

Mikakatano mpe mitungisi

Kompanyi ya ba ambulance ezali kokutana na mikakatano mpo bato bazali kobenga mpo na kotuna makambo ya bango moko, mpo na maladi to kozoka ya moke, mpo moto abungi nimero kasi abengi 999, to kaka mpo na masɛki. Likambo ya mabe koleka, bato mosusu ya maladi to bato mosusu ná bandeko na bango, bazali kosilikela ata mpe kobundisa minganga oyo bayei kosalisa bango. Nkanda na bango ekoki kouta na komitungisa, to mpo bamɛli bangi, to mpo bakanisi ete bayei kosalisa ndeko na bango noki te. Likambo yango ezali pɛtɛɛ te mpo na kosilisa yango, kasi bakampanye oyo basali ekitisi mwa moke likambo yango.

[Bililingi na lokasa 10]

Kompanyi eyambaka telefone soki 3 000 ya bato oyo babengi nokinoki na mokolo

[Maloba mpo na kolimbola eutelo ya bafɔtɔ na lokasa 10]

Bafɔtɔ nyonso: Na ndingisa ya London Ambulance Service NHS Trust