Ezali mpasi kokangela yango motema

Nicolle azalaki mwana moko ya nzoto kolɔngɔnɔ. Kasi mokolo moko na mpokwa, alelaki motó mpasi, mpe baboti na ye bamemaki ye na lopitalo. Na mpokwa ya mokolo oyo elandaki, wana minganga bazalaki naino kotalatala ye, motema ya Nicolle ekangamaki. Baekzame mosusu oyo basalaki ye emonisaki ete azali na maladi moko oyo eutaka na mikrobe kasi ezwaka bato mingi te. Maladi yango epanzanaki na mimpululu, na bangɛi, mpe na motema na ye. Mikolo mibale elekaki te, Nicolle akufaki. Azalaki kaka na mbula misato.

LIWA ya moto oyo tolingaka ezali moko na makambo oyo ebulunganisaka mingi mpenza. Na bantango mosusu, moto akoki komona lokola akokoka te kokangela yango motema. Isabelle, mama ya Nicolle, alobi boye: “Nazali mpenza na mposa makasi ya komona Nicolle. Nazali kokanisa ndenge azalaki koyamba ngai, nsolo ya nzoto na ye, mpe boboto na ye. Nazali kokanisa ndenge azalaki kopesa ngai fololo mokolo na mokolo. Nakanisaka Nicolle ntango nyonso.”

Yo mpe obungisá moto moko oyo olingaka​—mwana, molongani, leki to yaya, moboti to moninga moko ya motema? Soki ezali bongo, ndenge nini okoki kobunda na mpasi na yo?