Biblia elobi nini?

Mpo na nini kokeba na maloba na yo?

Nsima ya kosolola na bonkonde na mwasi moko mobange, mpe lokola ayebaki te ete mikro ekangami naino te, Premier ministre ya ekólo moko alobaki ete mwasi yango azali motó makasi, mpe alobaki na nkanda ete bato na ye basengelaki kopekisa mwasi yango aya wana. Bato ya ekólo mobimba bayokaki mabe mpo na ndenge alobaki bongo mpo na mwasi yango. Lokola lokumu na ye ebebaki, nsima ya mikolo mwambe, alongaki na voti te mpo atikala Premier ministre.

MOTO moko te akoki kopekisa lolemo na ye na ndenge ya kokoka. (Yakobo 3:2) Atako bongo, ndakisa oyo touti kolobela emonisi ete tosengeli kokeba na maloba na biso. Lokumu na yo, mosala na yo, ata mpe boyokani na yo na basusu etaleli mingimingi ndenge na yo ya koloba.

Kasi esuki kaka wana te. Biblia elobi ete maloba na yo emonisaka bomoto na yo ya kati, ndenge ozalaka mpenza. Yesu alobaki boye: “Monɔkɔ elobaka nde makambo oyo etondi na motema.” (Matai 12:34) Lokola maloba na yo emonisaka bomoto na yo, ata mpe mayoki mpe makanisi na yo, ezali na ntina mingi otalela malamumalamu maloba na yo. Biblia ekoki kosalisa yo? Tótala makambo oyo elandi.

Ndenge oyo okoki kobongisa elobeli na yo

Maloba ebandaka na makanisi. Mpo obongisa maloba na yo, osengeli kotalela mpe kobongisa ndenge na yo ya kokanisa. Talá ndenge toli ya Liloba ya Nzambe ekoki kobongisa makanisi na yo soki osaleli yango, mpe bongo kobongisa maloba na yo.

Tondisá motema na yo na makambo ya malamu. Biblia elobeli makambo yango ya malamu na maloba oyo: “Makambo nyonso ya solo, makambo nyonso ya lokumu, makambo nyonso ya boyengebene, makambo nyonso ya pɛto, makambo nyonso oyo ekoki kolingama, makambo nyonso oyo elobelami malamu, soki ezaleli moko ya malamu ezali mpe soki eloko moko oyo ebongi kokumisama ezali, bókoba kokanisa makambo wana.”​—Bafilipi 4:8.

Kolanda toli yango ekosalisa yo olongola makanisi ya mabe. Kobosana te ete makambo oyo omonaka mpe oyo otángaka nde ekɔtaka na bɔɔngɔ na yo. Na yango, mpo na koboya kokóma na makanisi ya mabe, kimá makambo oyo ekoki kobebisa makanisi na yo. Yango elingi koloba ete osengeli koboya kominanola ya mobulu mpe ya mbindo. (Nzembo 11:5; Baefese 5:3, 4) Kanisáká nde makambo ya pɛto mpe oyo ezali malamu. Biblia ekoki kosalisa yo na likambo yango. Na ndakisa, tángá Masese 4:20-27; Baefese 4:20-32; mpe Yakobo 3:2-12. Na nsima, luká komona ndenge kosalela mitinda oyo ezali na bavɛrsɛ yango ekoki kobongisa maloba na yo.a

Kanisá malamu liboso ya koloba. Masese 12:18 elobi boye: “Moto mosusu alobaka kozanga kokanisa lokola nde azali kozokisa na mopanga, kasi lolemo ya bato ya bwanya nde nkisi oyo ebikisaka.” Soki omoni ete mbala mingi ‘ozokisaka’ mayoki ya basusu, ekozala malamu osala makasi okanisaka liboso ya koloba. Landá toli ya malamu oyo ezali na Masese 15:28 ete: “Motema ya moyengebene emanyolaka mpo na koyanola, kasi monɔkɔ ya bato mabe esopasopaka makambo ya mabe.”

Meká komityela mokano. Na boumeli ya sanza oyo ezali koya, zwá ekateli ya kobimisa te likambo ya liboso oyo eyeli yo na makanisi, mingimingi soki bapesi yo nkanda. Kanisáká nde bavɛrsɛ oyo totángi na lisolo oyo, mpe salá milende olobaka na mayele, na bolingo, mpe na boboto. (Masese 15:1-4, 23) Kasi esuki wana te.

Bondelá Nzambe asalisa yo. Mokomi moko ya Biblia abondelaki boye: “Maloba ya monɔkɔ na ngai mpe komanyola ya motema na ngai ekóma elɛngi liboso na yo, Ee Yehova.” (Nzembo 19:14) Yebisá Yehova Nzambe mposa na yo ya kobimisa maloba oyo esepelisaka ye mpe oyo ekosala ete basusu básepela na yo. Masese 18:20, 21 elobi boye: “Kómisá maloba na yo malamu​—okosepela mpo osali bongo. Maloba ekoki kopesa liwa to bomoi!”​—Biblia Contemporary English Version.

Salelá Liloba ya Nzambe lokola talatala. Biblia ezali lokola talatala oyo okoki kosalela mpo na komitala malamumalamu. (Yakobo 1:23-25) Na ndakisa, ntango ozali kokanisa mitinda misato ya Biblia oyo elandi, omituna boye: ‘Maloba na ngai mpe ndenge basusu bamonaka ngai eyokani na mitinda yango?’

“Eyano, ntango ezali ya boboto, elongolaka nkɛlɛ, kasi liloba oyo epesaka mpasi ematisaka nkanda.” (Masese 15:1) Olobaka na boboto mpe na ndenge ya kotya kimya?

“Liloba ya kopɔla ebima na monɔkɔ na bino te, kasi nde liloba nyonso oyo ezali malamu mpo na kotonga na ntango mposa ezali, mpo epesa bayoki eloko ya malonga.” (Baefese 4:29) Maloba na yo etongaka bato oyo bazali elongo na yo?

“Liloba na bino ezala ntango nyonso kitoko, eyeisama elɛngi na mungwa, mpo na koyeba ndenge oyo bosengeli kopesa moto mokomoko eyano.” (Bakolose 4:6) Osalaka makasi, ata soki matata ebimi, ete maloba na yo ezala kitoko mpo epesa mpasi te na baoyo bazali koyoka yango?

Soki obongisi bambeba oyo omoni na talatala, okobima kitoko na miso ya bato mpe yo moko okomiyoka malamu. Ekozala mpe bongo soki obongisi maloba na yo na lisalisi ya Liloba ya Nzambe, oyo ezali lokola talatala.

[Maloba na nse ya lokasa]

OSILÁ KOMITUNA?

● Maloba na yo emonisaka nini?​—Luka 6:45.

● Ndenge nini osengeli koloba na basusu?​—Baefese 4:29; Bakolose 4:6.

● Makambo nini okoki mpenza kosala mpo obongisa maloba na yo?​—Nzembo 19:14; Bafilipi 4:8.

[Elilingi na lokasa 15]

Maloba na biso ekoki kobebisa lokumu na biso mpe boyokani na biso na basusu